Ստորագրվել է Ուկրաինայի չորս օկուպացված շրջանների Ռուսաստանին միանալու մասին պայմանագիրը

«Դոնեցկի և Լուգանսկի Ժողովրդական Հանրապետություններում, Զապորոժիեի և Խերսոնի նահանգներում ապրող միլիոնավոր մարդկանց ընտրության հետևում կանգնած է մեր ընդհանուր ճակատագիրը և հազարամյա պատմությունը։ Մարդիկ այս հոգևոր կապը փոխանցել են իրենց երեխաներին ու թոռներին։ Չնայած բոլոր փորձություններին, նրանց սերը Ռուսաստանի հանդեպ տևեց տարիներ, և ոչ ոք չի կարող ոչնչացնել այդ զգացումը։ Ահա թե ինչու և՛ ավագ սերունդը, և՛ երիտասարդները, որոնք ծնվել են Խորհրդային Միության փլուզումից հետո, քվեարկել են հանուն մեր միասնության, մեր ընդհանուր ապագայի»,- ասել է Վլադիմիր Պուտինը։

ՌԴ նախագահը կոչ է արել Ուկրաինային անհապաղ դադարեցնել կրակը. «Կիևի ռեժիմին կոչ ենք անում անհապաղ դադարեցնել կրակը, բոլոր ռազմական գործողությունները, պատերազմը, որը սանձազերծեցին 2014 թվականին և վերադառնալ բանակցությունների սեղան»։

Պուտինի խոսքով՝ Ռուսաստանը պատրաստ է նստել բանակցությունների սեղանի շուրջ, սակայն «Զապորոժիեի և Խերսոնի կարգավիճակը չի քննարկվի»։

«Թող բոլորը հիշեն, որ Լուգանսկում և Դոնեցկում, Խերսոնում և Զապորոժիեում ապրող մարդիկ դառնում են մեր քաղաքացիները՝ ընդմիշտ։ Կիևի ներկայիս կառավարությունը պետք է հարգի ժողովրդի կամքի այս ազատ դրսևորումը։ Միայն սա կարող է լինել խաղաղության ճանապարհը։

Մենք կպաշտպանենք մեր հողը բոլոր առկա ուժերով և միջոցներով, կանենք ամեն ինչ՝ ապահովելու մեր ժողովրդի անվտանգ կյանքը»,- ասել է Պուտինը։

Ռուսական պետական ​​լրատվամիջոցի տեղեկություններով՝ Կրեմլի մամուլի խոսնակ Դմիտրի Պեսկովը պարզաբանել է, որ այսպես կոչված Դոնեցկի ու Լուգանսկի Ժողովրդական Հանրապետությունները Ռուսաստանի մաս են կազմում 2014 թվականի դրությամբ առկա շրջանների սահմաններով՝ տարածքներով, որոնք այժմ վերահսկվում են Ուկրաինայի կողմից: Նույնը վերաբերում է Զապորոժիեի մարզին, որի գլխավոր քաղաքը՝ Զապորոժիեն, երբեք չի օկուպացվել Ռուսաստանի կողմից և մինչ օրս վերահսկվում է Կիևի կողմից։

Ռուսաստանի կողմից Ուկրաինայի օկուպացված շրջանների բռնակցմանը նախորդել է այսպես կոչված հանրաքվեներ, որոնց լեգիտիմությունը չի ճանաչում Ուկրաինան և միջազգային հանրությունը: ՄԱԿ-ի գլխավոր քարտուղարի խոսքով՝ այսպես կոչված հանրաքվեներն անցկացվել են ակտիվ զինված հակամարտության ժամանակ, Ռուսաստանի կողմից գրավված վայրերում, և դա չի կարելի անվանել ժողովրդի իրական կամարտահայտություն։

Ռուսական զինված ուժերի ճնշման տակ 2014 թվականին Ղրիմի թերակղզում և Սևաստոպոլ քաղաքում անցկացվեցին անօրինական հանրաքվեներ, որից հետո Ռուսաստանը բռնակցեց Ղրիմն ու Սևաստոպոլը։