Թերջոլայում նախկին կնոջ վրա բենզին լցրած ու սպանած տղամարդը մահացել է

Սպանությունը տեղի է ունեցել նոյեմբերի 24-ի երեկոյան։ Նախկին ամուսինը աշխատավայրում, «Մագնիտ» խանութների ցանցի մասնաճյուղերից մեկում մոտեցել է երկու երեխաների մորը, փակել սենյակում, վրան բենզին լցրել ու այրել։ Կինը օգնություն է խնդրել, սակայն խանութի աշխատակիցները չեն կարողացել բացել կողպված դուռը։ Թամիլա Լիլուաշվիլին տեղում մահացել է։ Միջադեպի ժամանակ այրվածքներ է ստացել նաև Լևան Զվիադաձեն։ Նրան հիվանդանոց են տեղափոխել շոկային վիճակում։

Ոստիկանությունը դեպքի առթիվ հետաքննություն է սկսել քրեական օրենքի 11 Պրիմա-109 հոդվածով, որը վերաբերում է առանձնակի դաժանությամբ ընտանիքի անդամի դիտավորությամբ սպանությանը։ Զվիադաձեի նկատմամբ նախկինում սահմանափակող օրդեր է կիրառվել նախկին կնոջ հետ ունեցած կոնֆլիկտի պատճառով։ Նա խնդրել է կնոջը հաշտվել և ապրել իր հետ։

Վրաստանում 2022 թվականի 10 ամսում 18 կին է սպանվել: Նույն ժամանակահատվածում փորձել են սպանել 32 կնոջ։ Այստեղից սպանության փորձի 26 դեպքը կատարվել է ընտանեկան հանցագործության հատկանիշներով։ Ընտանեկան բռնության դեպքերով հունվար-սեպտեմբերին ոստիկանությունը 6 520 սահմանափակող օրդեր է արձակել։

2021 թվականին սպանվել է 22 կին։ 11 դեպք կատարվել է ընտանիքի անդամի կողմից, իսկ 11 դեպքով բացահայտվել է հանցագործության կատարման այլ դրդապատճառ։ Արձանագրվել է 31 կնոջ նկատմամբ սպանության փորձի փաստ, որից 16-ը կատարվել է ընտանեկան հանցագործության, 15-ը՝ այլ հիմքերով։ Ներքին գործերի նախարարությունը նախորդ տարի 9 376 սահմանափակող օրդեր է արձակել։