Թրամփը առավելագույն ճնշում է գործադրելու Իրանի և Իրանի դաշնակից Իվանիշվիլիի ռեժիմի վրա․ Ուիլսոն

Հադսոնի ինստիտուտի կողմից Վրաստանի հարցով քննարկման ժամանակ կոնգրեսականն ասել է, որ կարծում է, որ «Վրացական երազանքի» դեմ պատժամիջոցները Թրամփի վարչակազմի, մասնավորապես՝ պետքարտուղար Մարկ Ռուբիոյի աշխատանքի պայմաններում կավելանան։

«Պետքարտուղար Ռուբիոն, նրա ընտանիքը փախել է ձախողված խորհրդային կայսրությունից, որը բռնապետություն ուներ Կուբայում»,- նշել է Ուիլսոնը։

Ջո Ուիլսոնի խոսքով՝ Բիձինա Իվանիշվիլին, ով ցանկանում է լինել Վրաստանի բռնապետը, ռազմական հանցագործ Պուտինի, Չինաստանի Կոմունիստական ​​կուսակցության և Թեհրանի ռեժիմի խամաճիկն է։

«Նա պայքարում է, որ Վրաստանը հայտնվի զավթիչների ազդեցության տակ։ Այս խամաճիկ վարչապետը [Իրակլի Կոբախիձեն] գնաց Թեհրան՝ հանդիպելու մարդասպան ռեժիմի հետ հենց այն ժամանակ, երբ ռեժիմը ծրագրում էր սպանել Դոնալդ Թրամփին։

Մենք գիտենք, որ այս ռեժիմը պայմանագիր է կնքել Չինաստանի կոմունիստական ​​կուսակցության հետ՝ կառուցելու խոշոր խորջրյա նավահանգիստ, չնայած Եվրամիության և Միացյալ Նահանգների առաջարկներին:

Նա փորձում է վաճառել Վրաստանը և վրաց ժողովրդին՝ հօգուտ իր դիկտատուրայի, որը պահպանվում է զենքի, ոչ թե ժողովրդավարության, օրենքի գերակայության միջոցով, մինչդեռ ռազմական հանցագործ Պուտինը շարունակում է ձախողված Խորհրդային Միությունը վերականգնելու իր ջանքերը:

Վրաց ժողովուրդն ազատություն է ուզում։ Նրանք դա նորից ու նորից ցույց են տվել՝ ավելի քան 40 օր բողոքի ցույցեր անցկացնելով պարզ պահանջով՝ ազատ ու արդար ընտրություններ»,- ասել է Ջո Ուիլսոնը։

Հանրապետական ​​կոնգրեսականի խոսքով՝ Կոնգրեսում իր նախաձեռնած օրինագիծը՝ «Մեգոբարի ակտը» պահանջում է քննարկել «Վրացական երազանքի» բոլոր պաշտոնյաների և նրանց ընտանիքի անդամների նկատմամբ պատժամիջոց կիրառելու հարցը։ Միաժամանակ այն ներառում է ժողովրդավարության և ազատության չափանիշները, որոնք բավարարելու դեպքում ԱՄՆ-ն էլ ավելի կխորացնի իր հարաբերությունները Վրաստանի հետ։

Ջո Ուիլսոնը խոսել է նաև «Վրացական երազանքի չճանաչման ակտի» մասին և ասել, որ այն ԱՄՆ-ին արգելում է ճանաչել «Իվանիշվիլիի ռեժիմը» ​​և Սալոմե Զուրաբիշվիլիին ճանաչում է որպես Վրաստանի լեգիտիմ նախագահ, քանի դեռ երկրում չեն անցկացվել ազատ և արդար ընտրություններ։

«Ամերիկան ​​բռնապետական ​​և անօրինական ռեժիմները չճանաչելու վաղեմի ավանդույթ ունի։

Այն սկսվել է 1940 թվականին՝ Էստոնիայի, Լատվիայի և Լիտվայի խորհրդային օկուպացիայից հետո։ Մենք երբեք նրանց չենք մերժել նույնքան ազատ լինելու հնարավորությունը, որքան այսօր: ԱՄՆ-ը չի ճանաչում նաև Պուտինի կողմից Ուկրաինայի Ղրիմի և Վրաստանի Հարավային Օսիայի ու Աբխազիայի օկուպացիան։ «Ասադի ռեժիմի չճանաչման ակտի» շնորհիվ ԱՄՆ-ը չճանաչեց Ասադի ռեժիմը։ Այս հաջողությունների վրա է հիմնված «Վրացական մղձավանջի չճանաչման ակտը»,- նշել է կոնգրեսական Ուիլսոնը։

Դոնալդ Թրամփի նախագահի պաշտոնում երդմնակալության արարողությունը տեղի կունենա հունվարի 20-ին, որից հետո նրա վարչակազմը պաշտոնապես կսկսի աշխատանքը։ «Վրացական երազանքի» առաջնորդները հույսեր են կապում այս օրվա հետ և կարծում են, որ ԱՄՆ կառավարության վերաբերմունքն իրենց նկատմամբ կփոխվի։