Թրամփի խոսքով՝ ինքը չի հավատում, որ Զելենսկիին «բռնապետ» է անվանել

Այս մասին Թրամփը հայտարարել է փետրվարի 27-ին Սպիտակ տանը Մեծ Բրիտանիայի վարչապետ Քիր Սթարմերի հետ կայացած մամուլի ասուլիսում։

«Ե՞ս եմ դա ասել։ Ես չեմ կարող հավատալ, որ դա ես եմ ասել: Հաջորդ հարցը», - պատասխանել է Թրամփը BBC-ի թղթակցին, ով հարցրել է, թե արդյոք ինքը դեռ կարծում է, որ Զելենսկին «բռնապետ է»:

Դոնալդ Թրամփը փետրվարի 19-ին Truth Social հարթակում հրապարակված գրառման մեջ Վլադիմիր Զելենսկիին անվանել է «դիկտատոր առանց ընտրությունների»՝ կրկնելով Ռուսաստանի կառավարության կեղծ նարատիվը Ուկրաինայի նախագահի «լեգիտիմ չլինելու» մասին։

Երբ մի քանի օր անց ԱՄՆ նախագահին հարցրել են, թե արդյոք նա Ռուսաստանի նախագահ Վլադիմիր Պուտինին «բռնապետ» կանվանի, Թրամփը պատասխանել է, որ այդ բառը հեշտ չի կարող օգտագործել։

Վլադիմիր Զելենսկին Վաշինգտոն կժամանի ուրբաթ օրը՝ փետրվարի 28-ին, և ակնկալվում է, որ Դոնալդ Թրամփի հետ հանքարդյունաբերության մասին համաձայնագիր կստորագրի։ Թրամփն ասել է, որ դա «շատ կարևոր համաձայնագիր կլինի երկու կողմերի համար»:

«Վաղը խաղաղության ուղղությամբ առաջընթացը կշարունակվի, երբ նախագահ Զելենսկին այցելի Սպիտակ տուն... Մենք պատմական համաձայնագիր կստորագրենք, որը Միացյալ Նահանգներին կդարձնի առանցքային գործընկեր Ուկրաինայի հանքային պաշարների զարգացման գործում...

Ամերիկացի հարկատուներն այժմ իրականում կփոխհատուցվեն այն գումարների և հարյուր միլիարդավոր դոլարների համար, որոնք ծախսվել են Ուկրաինային պաշտպանելու համար»,- ասել է Թրամփը։