Վրաց ժողովուրդն այլ ճակատագիր է ցանկանում, քան այն, որին այժմ հետևում է կառավարությունը․ Վալտոնեն

Այս մասին Վալտոնենը հայտարարել է Բրյուսելում և նշել, որ Վրաստանում տեղի ունեցող վերջին զարգացումները կքննարկվեն ԵՄ անդամ երկրների արտգործնախարարների այսօրվա հանդիպմանը։

«Վերջին շաբաթների և ամիսների ընթացքում մենք դիտարկում էինք իրավիճակը Վրաստանում։ Վրաց ժողովուրդը ցանկանում է ունենալ այլ ճակատագիր, քան այն, որին այժմ հետևում է կառավարությունը: Ես սա ասում եմ որպես ԵԱՀԿ այս տարվա գործող նախագահ։ Մենք շատ մտահոգված ենք ներկայիս իրավիճակով»,- ասել է Վալտոնենը։

Հարցին, թե արդյոք նոր ընտրությունները ելք են ներկայիս փակուղուց, Ֆինլանդիայի արտգործնախարարն ասել է.

«ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) զեկույցը շատ լավ նախաձեռնություն է պարունակում վրաց ժողովրդի համար՝ պահանջելու նոր ընտրություններ։

Այսօր՝ փետրվարի 24-ին, Բրյուսելում տեղի է ունենում ԵՄ ԱԳ նախարարների հանդիպումը։ Հանդիպումը կվարի Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը։ Ինչպես նա է հայտարարել հանդիպումից առաջ, Վրաստանում տեղի ունեցող իրադարձությունները «բավականին մտահոգիչ» են, և նրանք կքննարկեն, թե ինչ կարելի է անել։

Ըստ Կալլասի՝ իրենք առաջարկել են պատժամիջոցներ կիրառել նրանց նկատմամբ, ովքեր իրականում բռնություն են կիրառում խաղաղ ցուցարարների նկատմամբ, սակայն մինչ այժմ չեն կարողացել համոզել երկու եվրոպական երկրներին [Հունգարիային և Սլովակիային] համաձայնության գալ։ «Մենք շարունակում ենք փորձել»,- նշել է Կայա Կալլասը։