«Վրացական երազանքը» թույլ է տալիս Ռուսաստանին մեծացնել ազդեցությունը երկրում. ԱՄՆ հետախուզություն

«Ռուսաստանը գրեթե անկասկած մտադիր է Վրաստանը վերադարձնել իր ազդեցության գոտի։

Հոկտեմբերի խորհրդարանական ընտրություններից ի վեր «Վրացական երազանքի» կառավարությունը ստեղծել է մի միջավայր, որը թույլ է տալիս Ռուսաստանին մեծացնել իր ազդեցությունը երկրում», - նշվում է զեկույցում։

Ինչ վերաբերում է Հայաստանին, զեկույցում ասվում է. «Հայ-ռուսական հարաբերությունները վատթարացան անցյալ տարի, երբ Հայաստանը սպառնաց դուրս գալ Հավաքական անվտանգության պայմանագրի կազմակերպությունից: Ռուսաստանը նաև օգտագործել է տեղեկատվական գործողություններ՝ վարկաբեկելու Հայաստանի ժողովրդավարությունը և նրա ավելի արևմտամետ ղեկավարությանը»:

Զեկույցը, Ռուսաստանից եկող սպառնալիքներից բացի, անդրադառնում է նաև Չինաստանից, Իրանից (և նրա միջնորդ ուժերից), Հյուսիսային Կորեայից և այլ երկրներից եկող սպառնալիքներին։

«Սա լրիվ անհեթեթություն է, ի՞նչ ազդեցության մասին է խոսքը։ Այն փաստը, որ նման անհեթեթություն է հանդիպում նման կարևոր փաստաթղթերում, վկայում է «դիփ սթեյթի» ազդեցության մասին», - այսպես է արձագանքել «Վրացական երազանքի» վարչապետ Իրակլի Կոբախիձեն ԱՄՆ Պաշտպանության հետախուզական գործակալության զեկույցում Վրաստանի մասին գնահատականին։