«Վրացական երազանքի» ներկայացուցիչները Բաթումիում հարձակվել են լրագրող Զվիադ Քորիձեի վրա

Զվիադ Քորիձեն Բաթումիում էր «Նեթգազեթի» և «Բաթումելեբի» առցանց լրատվամիջոցների ղեկավար Մզիա Ամաղլոբելիի ձերբակալության պատճառով և ներկա էր հունվարի 14-ին կայացած դատական ​​նիստին։

«Ուշ եկա հյուրանոց, սենյակ բարձրանալուց առաջ հյուրանոցի նախասրահում նստած էի աթոռին, հեռախոսով էի խոսում։ Այս պահին բարի կողքին մի քանի սեղանների մոտ մարդիկ էին, ովքեր խմում էին իրենց համար, տոնում։ Մեր միջև ոչ մի շփում չկար, մինչև սեղաններից մեկից մի երիտասարդ եկավ, խմիչք բերեց և ասաց, որ շնորհավոր Նոր տարին ու ինձ խմիչք առաջարկեց։ Ասացի, որ չեմ խմում ու շնորհավորեցի։ Ինքը ինձ ասաց, որ ճանաչում է ինձ, ու ինքը Գիորգի Մանվելիձեն է։ Այդքանով մեր շփումն ավարտվեց, և նա գնաց ու նստեց այնտեղ»,- պատմում է Զվիադ Քորիձեն։

Նրա խոսքով՝ մոտ 5-7 րոպեից Դիմիտրի Սամխարաձեն հայտնվել է հյուրանոցի նախասրահում՝ իրեն ուղեկցող մի կնոջ հետ, որը սկզբում մոտեցել է սեղանին, իսկ հետո՝ իրեն։

«Ինձ ասում է՝ ես քեզ ճանաչում եմ, դու Զվիադ Քորիձեն ես, ես գիտեմ, թե ինչի համար ես այստեղ, հայհոյեց «Ազգային շարժմանը»։ Ես ուշադրություն չդարձրի այս հայհոյանքներին: Հետո կտրուկ քայլով մոտեցավ դռանը, հետ եկավ, նորից ներս մտավ ու սկսեց բղավել՝ ի՞նչ ասացիր մեր մասին։ Ո՞ւմ ես հայհոյում։

Նա անցավ հայհոյանքների, վիրավորելու, ոտքով սեղանին էր խփում։ Այստեղ ինձ չեն հարվածել, և երբ տեսա, որ բոլոր սեղաններից եկան իմ ուղղությամբ, շարժվեցի դեպի նախասրահ, անվտանգության աշխատակիցներից աջակցություն խնդրեցի, անվտանգության աշխատակիցները խառնվեցին, այդ ժամանակ ինձ ինչ-որ բանով հարվածեցին, նրանցից մեկը հարվածեց ինձ այստեղ (ճակատին) և ակնոցս ամբողջովին կոտրվեց։ Երկրորդը՝ ես հաստատ գիտեմ, որ Գիորգի Մանվելիձեն ինչ-որ բան վերցրեց, հողով կերամիկական աման ու նետեց։ Չգիտեմ՝ հատուկ էր, թե ոչ, բայց շեղ հարվածեց»,- ասել է Քորիձեն։

Զվիադ Քորիձեին դեպքի վայրից տարել են հյուրանոցի անվտանգության աշխատակիցները։ Լրագրողի խոսքով՝ այդ ժամանակ իր հասցեին շարունակվել են սպառնալիքներն ու հայհոյանքները։

«Բարձրացա սենյակ ու մոտ 15-20 րոպեից ընկերներս ու գործընկերներս, որոնց տեղեկացրել էի ու եկել էին հյուրանոց, արդեն այլ պատկեր տեսան։ Նրանք տեսել են Գիորգի Գախարիային բավականին վնասված և ծանր վնասվածքներով»,- ասել է Քորիձեն։

Միջադեպից հետո Զվիադ Քորիձեն բուժզննում է անցել, նա լուրջ վնասվածքներ չունի։

Գիորգի Գախարիայի վրա խմբակային հարձակման առնչությամբ ՆԳՆ-ն հետաքննություն է սկսել Քրեական օրենսգրքի 126-րդ հոդվածով, որը վերաբերում է բռնությանը։ Ընդդիմադիր կուսակցության առաջնորդը և նախկին վարչապետը քթի ոսկորի կոտրվածք և ուղեղի ցնցում է ստացել։

Ոստիկանությունը «Շերատոն» հյուրանոց է ժամանել մոտ մեկ ժամ ուշացումով։ «Հանուն Վրաստանի» փոխնախագահ Նաթիա Մեզվրիշվիլիի խոսքով՝ հանցագործության վայրի պարագծը դիտավորյալ չի պաշտպանվել, ինչը վկայում է ՆԳՆ աշխատակիցների կողմից ապացույցների ոչնչացման մասին։

Վրաստանի հանրային պաշտպանը դատապարտել է Զվիադ Քորիձեի և Գիորգի Գախարիայի վրա հարձակումը։ Լևան Իոսելիանին կոչ է արել քննչական ծառայություններին իրականացնել լիարժեք քննություն և բացահայտել պատասխանատուներին։