Վրաստանը գտնվում է ճամփաբաժնի վրա, երկիրը պետք է մնա դեպի Եվրոպա տանող ճանապարհին․ Ֆոն դեր Լայեն

«Խորը մտահոգությամբ եմ հետևում Վրաստանում տիրող իրավիճակին և դատապարտում բռնությունները Թբիլիսիի փողոցներում։

Վրաստանի քաղաքացիները ցուցաբերում են անքակտելի նվիրվածություն ժողովրդավարությանը։ Վրաստանի կառավարությունը պետք է հաշվի առնի այս հստակ ուղերձը։

ԵՄ-ն նաև հստակ հայտնել է իր մտահոգությունները «արտաքին ազդեցության թափանցիկության մասին» օրենքի վերաբերյալ:

Վրաստանի ժողովուրդն իր երկրի համար ցանկանում է եվրոպական ապագա։ Եվրոպական խորհուրդը ճանաչեց այդ ձգտումները, դեկտեմբերին Վրաստանին շնորհեց թեկնածուի կարգավիճակ և հստակ ճանապարհ նշեց ԵՄ անդամակցության շուրջ բանակցություններ սկսելու համար։

Մենք ակնկալում ենք, որ Վրաստանի կառավարությունը կգործի անհապաղ՝ ձեռնարկելու այն միջոցները, որոնք իրականացնելու պարտավորություն ստանձնեց որպես ԵՄ թեկնածու երկիր։ Վրաստանը գտնվում է ճամփաբաժնի վրա։ Երկիրը պետք է մնա դեպի Եվրոպա տանող ճանապարհին»,- ասել է Ֆոն դեր Լայենը։

Արդեն երկրորդ օրն է, ինչ իշխանությունները ճնշում են քաղաքացիների խաղաղ ցույցը, ովքեր խորհրդարանի դիմաց բողոքում են ռուսական օրենքի դեմ։ Ներքին գործերի նախարարությունը նրանց դեմ օգտագործում է պղպեղի սփրեյ, ջրցան մեքենա և արցունքաբեր գազ։ Երեկ հատուկ ջոկատայինները հավանաբար ռետինե փամփուշտներով կրակել են ցուցարարների վրա։ Հանրահավաքի մասնակիցների մեծ մասը երիտասարդներ են, այդ թվում՝ դպրոցականներ։

Մայիսի 1-ին խորհրդարանը 83 կողմ, 23 դեմ ձայների հարաբերակցությամբ երկրորդ ընթերցմամբ ընդունեց ռուսական օրենքը, որը մասշտաբային բողոքի ցույցեր էր առաջացրել։ Քվեարկությունից առաջ վարչապետ Իրակլի Կոբախիձեն ճեպազրույց է անցկացրել, որի ժամանակ ասել է, որ «Վրացական երազանքը» չի պատրաստվում գնալ փոխզիջումների և հրաժարվել ռուսական օրենքից։

Խորհրդարանական ընդդիմության անդամների կարծիքով՝ Բիձինա Իվանիշվիլին և 83 պատգամավորները աշխարհաքաղաքական ընտրություն են կատարել հօգուտ Ռուսաստանի՝ անտեսելով միջազգային գործընկերների զգուշացումը, որ եթե օրենքն ընդունվի, երկիրը չի դառնա Եվրոպական միության անդամ։