Վրաստանի կառավարությունը ցույց տվեց, որ իրեն չի հետաքրքրում եվրոպական ապագան․ սենատոր Ռիշ

«Այսօր ընդունելով այն օրենքը, որը մեծապես կվնասի քաղաքացիական հասարակությանը, Վրաստանի կառավարությունը հստակ ցույց տվեց, որ իրեն չի հետաքրքրում եվրոպական ապագան։ Սա զանգվածային ապտակ է Վրաստանի քաղաքացիների 80%-ի համար, ովքեր ցանկանում են անդամակցել ԵՄ-ին»,- գրել է սենատորը X սոցիալական ցանցում։

Ջիմ Ռիշն այն 14 սենատորներից է, ովքեր ապրիլի վերջին նախազգուշական նամակ էին ուղարկել Վրաստանի վարչապետ Իրակլի Կոբախիձեին։ Նամակում նշվում է, որ եթե օրենքը ընդունվի, իրենք ստիպված կլինեն խրախուսել Վրաստանի նկատմամբ ԱՄՆ քաղաքականության փոփոխությունը, որը ներառում է անհատական ​​պատժամիջոցների սահմանում, ուղղակի ֆինանսավորման դադարեցում և վիզային սահմանափակումների ընդլայնում։ Այժմ, երբ «Վրացական երազանքը» չի հրաժարվել ռուսական օրենքից, սպասվում է, որ Կոնգրեսի 29 անդամները կմիանան սենատորների նախաձեռնությանը։

2024 թվականի ապրիլի 3-ին «Վրացական երազանքը» կրկին օրակարգ բերեց այսպես կոչված «օտարերկրյա գործակալների» մասին ռուսական օրենքը, որը մեկ տարի առաջ բազմահազարանոց բողոքի ակցիաներից հետո ետ կանչվեց, և եղավ խոստում, որ այն երբեք չի ընդունվի։ Ռուսական օրենքը պարտավորեցնում է անկախ լրատվամիջոցներին և ոչ կառավարական կազմակերպություններին, որոնք աշխատում են միջազգային կազմակերպությունների դրամաշնորհային աջակցությամբ և չեն վերահսկվում կառավարության կամ նրա հետ կապված խմբերի կողմից, գրանցվել որպես օտարերկրյա գործակալ։

Օրենքն առաջին և երկրորդ ընթերցմամբ ընդունվել է ապրիլի 17-ին և մայիսի 1-ին, իսկ վերջնական քվեարկությունը կայացել է այսօր՝ մայիսի 14-ի լիագումար նիստում։

Ռուսական օրենքին կողմ է քվեարկել 84 պատգամավոր, դեմ՝ 30-ը։ Բացի «Վրացական երազանքից» և «Ժողովրդի ուժից», օրենքի օգտին քվեարկել են նաև «Եվրոպացի սոցիալիստների» երկու անդամները։

Ընդդիմության ներկայացուցիչներն այս օրենքի ընդունումը որակում են որպես պետության դավաճանություն և սահմանադրական հեղաշրջում։ Նրանց գնահատմամբ՝ օրենքին սատարող բոլոր 84 պատգամավորները վտանգ են ներկայացնում Եվրամիության հետ առանց վիզայի և եվրաինտեգրման գործընթացի համար։

Ռուսական օրենքը ստորագրության համար կուղարկվի նախագահ Սալոմե Զուրաբիշվիլիին, ով մտադիր է օգտագործել վետոյի իրավունքը։