«Վրաստանի լուրերը» դիմել է դատարան՝ ընդդեմ առողջապահության նախարարության

Շուրջ 2 ամիս առողջապահության նախարարությունը միտումնավոր չի տրամադրում «Վրաստանի լուրերին» հետևյալ հանրային տեղեկությունը. քանի՞ մարդ է աշխատանքի տեղավորվել ծրագրի շրջանակներում, հանրային աշխատանքների ամբողջական ցանկը՝ ըստ մարզերի և կազմակերպությունների, 2022 թվականի մարտի 1-ից վարչական մարմինները հասարակական աշխատանքի քանի թափուր աշխատատեղի համար են դիմում գրանցվել, քանի՞ անձի հետ է կնքվել/չեղարկվել սոցիալական պայմանագիրը և այլն։

Նախարարությունը չի քննարկել նաև լրատվական կազմակերպության ներկայացրած վարչական բողոքը։

Վրաստանի կառավարությունը հասարակական աշխատանքներում զբաղվածության ծրագիրը սկսել է իրականացնել 2022 թվականից։ Ծրագրին կարող են մասնակցել «Սոցիալապես անապահով ընտանիքների տվյալների միասնական բազայում» հաշվառված 120 000 և ավելի ցածր վարկանիշ ունեցող 18 տարեկանից մինչև կենսաթոշակային տարիքի կենսապահովման նպաստ ստացող ընտանիքի անդամը, որը զբաղվածություն չունի և (կամ) գրանցված չէ որպես ինքնազբաղված։ Ծրագրի շրջանակներում պետությունն ամեն ամիս աշխատողին վճարում է մոտ 300 լարի։ Բացի այդ, պետության կողմից սոցիալապես անապահով անձանց տրամադրվող բոլոր արտոնությունները կպահպանվեն 4 տարվա ընթացքում։ Ըստ տարբեր աղբյուրների՝

ծրագրի շրջանակներում կառավարությունում հիմնականում աշխատում են «Վրացական երազանքի» ակտիվիստներն ու համակիրները, որոնք ունեն «սոցիալապես անապահովի» կարգավիճակ։ Այս թեմայով «Վրաստանի լուրերը» լրագրողական հետաքննություն է պատրաստում։

Ծրագրի մեկնարկից ի վեր՝ 2023 թվականի մարտի 31-ի դրությամբ, հասարակական աշխատանքներում աշխատանքի տեղավորվելու հնարավորություն է ընձեռվել 34 227 սոցիալապես անապահով անձի։ Բաց աշխատաշուկայում աշխատանքի է տեղավորվել 11 384 մարդ, իսկ ոչ ֆորմալ գործունեությունը ֆորմալացրել է 1 860 մարդ։

Նախարարությունը ծրագրի հետ կապված տեղեկատվությունը թաքցնում է Վրաստանի խորհրդարանի անդամներից, սակայն, Վրաստանի Սահմանադրության 43-րդ հոդվածի համաձայն, խորհրդարանի անդամն իրավունք ունի հարց ուղղել կառավարությանը, խորհրդարանին հաշվետու այլ մարմնին, կառավարության անդամին, բոլոր մակարդակների տարածքային միավորի կառավարման մարմնին, պետական ​​հաստատությանը։ Խորհրդարանի անդամի հարցին ժամանակին և ամբողջական պատասխան տալը պարտադիր է։