Խորհրդարանը վաղը կորոշի նախագահի ընտրության օրը․ Պապուաշվիլի

«Խորհրդարանը վաղը կորոշի նախագահի ընտրության օրը։ Կան որոշակի հանգամանքներ, որոնք կարևոր է հաշվի առնել: Պետք է նախագահ ընտրենք հինգ տարի ժամկետով։ Ուստի, որպեսզի նախագահը հինգ տարով ընտրվի, կարևոր է, որ թե՛ ընտրությունները, թե՛ երդմնակալությունը տեղի ունենան այս տարի։ Ըստ այդմ, մենք վաղը կնշենք ամսաթիվը»,- լրագրողներին ասել է Պապուաշվիլին։

«Վրացական երազանքը» պատրաստվում է այսօր՝ նոյեմբերի 25-ին, ճանաչել 11-րդ գումարման խորհրդարանի լիազորությունները։ Ընդդիմադիր կուսակցությունները, որոնք, ըստ ԿԸՀ-ի տվյալների, հաղթահարել են ընտրությունների անցողիկ շեմը և 150 մանդատներից ստացել 61-ը, չեն ճանաչում խորհրդարանի լեգիտիմությունը։

Նախագահ Սալոմե Զուրաբիշվիլին հայտարարում է, որ խորհրդարանի առաջին նիստը հակասահմանադրական է. «1. Զանգվածային ընտրակեղծիքները խաթարեցին դրա լեգիտիմությունը. 2. Ես հրաժարվեցի առաջին նիստը հրավիրելուց, և սահմանադրությունը որևէ մեկին փոխարինող չի ճանաչում. 3. Իմ հայցն ընթացքի մեջ է Սահմանադրական դատարանում»,- գրել է Զուրաբիշվիլին X հարթակում։