Խորհրդարանի մոտ ակտիվիստ է ձերբակալվել, որի ձեռքին եղել է «Անծուխելիձեն անմահ է» գրությամբ պաստառ

Թամար Կուրատիշվիլին Ապրիլի 9-ի փողոցի մայթին պաստառով կանգնած է եղել, երբ նրան են մոտեցել մի քանի ոստիկաններ ու ձերբակալել։ Երկրորդ ձերբակալվածը՝ Լիլու Շավելաշվիլին, փորձել է օգնել նրան։

Ոստիկանությունից չեն պարզաբանել, թե ինչու են ձերբակալել քաղաքացիական ակտիվիստներին։

«Վրացական երազանքի» ժամանակավոր քննիչ հանձնաժողովի նիստին զուգահեռ խորհրդարանի մոտ մի քանի տասնյակ մարդ է հավաքվել։ Ինչպես նշում են ակցիայի մասնակիցները, իրենք բողոքում են հանձնաժողովի անդամների կողմից 2008 թվականի ռուս-վրացական պատերազմի հերոսների վիրավորանքների դեմ։

«Կրեմլի մասնաճյուղում ընթանում է վրացի գեներալների և վրացական բանակի դատավարությունը: Մենք չենք կարող հանդուրժել այն մարդկանց դատը, ովքեր 2008-ին պահպանեցին մեր անկախությունը, պետականությունը, պահպանեցին մեր լեզուն, հայրենիքը, հավատը: Նրանք, ովքեր հիմա նստած են Կրեմլի մասնաճյուղում, պատասխանատվության կենթարկվեն դավաճանության համար»,- ասել է ցույցին մասնակցող երիտասարդներից մեկը։

Ժամանակավոր քննիչ հանձնաժողովը՝ Թեա Ծուլուկիանիի գլխավորությամբ, 2008 թվականի պատերազմի հետ կապված հարցաքննել է գեներալներ Զազա Գոգավային և Մամուկա Կուրաշվիլիին։ Օգոստոսյան պատերազմի ժամանակ գեներալ Գոգավան միացյալ շտաբի պետն էր, իսկ Կուրաշվիլին՝ խաղաղապահ գործողությունների շտաբի ղեկավարը։ «Վրացական երազանքի» պատգամավորները փորձել են հայտնաբերել նախկին իշխանությունների հանցագործությունները պատերազմի ժամանակ, ինչը առաջացրել է քաղաքացիների մի մասի բողոքը։

Բիձինա Իվանիշվիլիի կուսակցությունը իշխանության գալուց 13 տարի անց ստեղծել է ժամանակավոր քննիչ հանձնաժողով՝ 2003-2012 թվականներին «Միացյալ ազգային շարժման» գործունեությունը հետաքննելու համար։ «Վրացական երազանքի» ղեկավարները նախապես ասում են, որ հանձնաժողովի եզրակացությունը թույլ կտա հայց ներկայացնել Սահմանադրական դատարան և պահանջել արգելել «Ազգային շարժման» գործունեությունը։

Այս թեմայով՝

«Վրացական երազանքը» ընդլայնում է ժամանակավոր քննիչ հանձնաժողովի մանդատը