Զելենսկիի խոսքով՝ Քելլոգի հետ հանդիպումը «կվերականգնի հույսը»

«Հանդիպում, որը կվերականգնի հույսը», - նկարագրել է Զելենսկին իր հանդիպումը Թրամփի հատուկ ներկայացուցչի հետ։

Նրա խոսքով՝ իրենք քննարկել են ռազմաճակատում առկա իրավիճակը, Ռուսաստանում պահվող ուկրաինացի ռազմագերիների ազատ արձակումը, անվտանգության երաշխիքների հուսալի ու հստակ համակարգի անհրաժեշտությունը։

«Ես երախտապարտ եմ այն ​​օգնության և երկկուսակցական աջակցության համար, որը Միացյալ Նահանգները ցուցաբերել է Ուկրաինային և ուկրաինացի ժողովրդին:

Մեզ և ողջ ազատ աշխարհի համար կարևոր է, որ զգացվի Ամերիկայի հզորությունը։

Մենք մանրամասն քննարկել ենք մարտադաշտում տիրող իրավիճակը և մեր բոլոր գերիներին վերադարձնելու ուղիները, ինչպես նաև անվտանգության արդյունավետ երաշխիքները»,- գրել է Զելենսկին Telegram-ում։

Խաղաղ բանակցությունների վերաբերյալ Վլադիմիր Զելենսկին նշել է, որ Ուկրաինան պատերազմի առաջին իսկ պահից խաղաղության է ձգտում։

«Մենք կարող ենք և պետք է խաղաղություն հաստատենք հուսալի և տևական, որպեսզի Ռուսաստանը այլևս երբեք չվերադառնա պատերազմի:

Ուկրաինան պատրաստ է Միացյալ Նահանգների նախագահի հետ ներդրումների և անվտանգության վերաբերյալ ամուր, իսկապես շահավետ համաձայնագրի։ Մենք առաջարկել ենք արդյունքի հասնելու ամենաարագ և ամենակառուցողական ճանապարհը։ Մեր թիմը պատրաստ է աշխատել 24/7 ռեժիմով։

Հաջողությունը միավորում է։ Աշխարհում բոլորին պետք է հաջողություն ԱՄՆ-ի հետ հարաբերություններում։ Շնորհակալություն գեներալ Քելլոգին՝ կարևոր արդյունքների հասնելու համար միասին աշխատելու համար»,- ասել է Ուկրաինայի նախագահը։

Հանդիպմանը նախորդել են Դոնալդ Թրամփի կոշտ հայտարարությունները Վլադիմիր Զելենսկիի հասցեին։ Թրամփը նրան անվանել է «դիկտատոր առանց ընտրությունների», ով պետք է արագ գործի, որպեսզի չկորցնի Ուկրաինան։ ԱՄՆ նախագահը նաև ասել է, որ Ուկրաինայի առաջնորդի վարկանիշը նվազել է մինչև 4%, թեև անհասկանալի է, թե ինչ տվյալների վրա է նա հիմնում այս թիվը։ Ի պատասխան՝ Զելենսկին Թրամփին մեղադրել է ռուսական ապատեղեկատվությունը կրկնելու մեջ։

Քիթ Քելլոգը փետրվարի 19-ին ժամանել է Կիև և նույն օրը հանդիպել Ուկրաինայի զինված ուժերի գլխավոր հրամանատար գեներալ Ալեքսանդր Սիրսկիի, Ուկրաինայի հատուկ ծառայությունների ղեկավարների և նախագահի աշխատակազմի ղեկավար Անդրեյ Երմակի հետ, իսկ հաջորդ օրը հանդիպել է ԱԳ նախարար Անդրեյ Շիբիգայի հետ։