Ժողովրդավարության մերժում է հրաժարվելը հանդիպումից, որի հետ համաձայն չես․ Ֆրանսիացի պատգամավորը Պապուաշվիլիի մասին

«ԵՄ-ն հակամարտությունների կառավարում է։ Մենք ունենք մեր անհամաձայնությունները, բայց աշխատում ենք միասին։ Ինձ համար շատ զարմանալի է, որ մի պատգամավոր ինձ ասում է. «Ես քեզ չեմ հանդիպի, քանի որ դու համաձայն չես ինձ հետ»։ Ինձ համար սա ժողովրդավարության լիակատար մերժում է։ Միակ տեղը, որտեղ կոնֆլիկտ չկա, գերեզմանոցն է, ես չեմ շտապում գնալ այնտեղ։ Մենք այստեղ ենք՝ գերմանացի և ֆրանսիացի։ Եվրոպա նշանակում է բանակցություններ այն մարդկանց հետ, ում հետ համաձայն չեք»,- ասել է Պետին՝ նախագահի նստավայրում հրավիրված մամուլի ասուլիսի ժամանակ։

Վրաստանում են Գերմանիայի, Ֆինլանդիայի, Շվեդիայի, Ֆրանսիայի, Լիտվայի, Լատվիայի, Էստոնիայի և Լեհաստանի խորհրդարանների արտաքին հարաբերությունների հանձնաժողովների նախագահները։ Նրանք մտահոգություն են հայտնել հոկտեմբերի 26-ի խորհրդարանական ընտրությունների առնչությամբ։ Ինչպես ասել է Բունդեսթագի պատգամավոր Միխայել Ռոթը, քանի դեռ լույս չի սփռվել ընտրությունների վրա, Եվրամիությունը չի կարող դրանք լեգիտիմ ճանաչել։

Պատվիրակության անդամներին հյուրընկալել է Վրաստանի նախագահ Սալոմե Զուրաբիշվիլին, իսկ խորհրդարանի նախագահ Շալվա Պապուաշվիլին հրաժարվել է մասնակցել նրանց հանդիպմանը։ Պատվիրակությանը չեն հանդիպել նաև խորհրդարանական հանձնաժողովների ղեկավարները և «Վրացական երազանքի» ներկայացուցիչները։

Որպես այս որոշման պատճառ Պապուաշվիլին նշել է պատվիրակության որոշ անդամների, այդ թվում՝ Լիտվայի Սեյմի արտաքին հարաբերությունների կոմիտեի նախագահ Ժիգիմանտաս Պավիլիոնիսի «ոչ բարեկամական վերաբերմունքը»։ Նա պատվիրակության անդամներին մեղադրում է «Եվրոպայի անունից անկարգություններ սերմանելու», ընտրություններին միջամտելու և երկրի սահմանադրությունն անտեսելու մեջ։