Baş nazir postuna “Gürcü Arzusu”nun sədri vəzifəsini icra edən İrakli Kobaxidzenin namizədliyi irəli sürüləcək. Bu barədə hökumət telekanalı “İmedi” məlumat yayıb.
Əsas xəbərlər
“İmedi”nin məlumatına görə, yanvarın 24-də “Gürcü Arzusu”nun siyasi şurasının iclası keçirilib və orada qərara alınıb ki, fevralın 1-də partiyanın qurultayında İrakli Kobaxidze baş nazir postuna namizəd göstərilsin. İrakli Ğaribaşvili istefa verdikdən sonra “Gürcü Arzusu”nun sədri postunu tutacaq. Bundan başqa, İrakli Kobaxidze partiyanın siyasi katibi də olacaq.
Bu gün səhər saatlarında parlamentin sədri Şalva Papuaşvili baş nazir İrakli Ğaribaşvilinin yaxın bir neçə gün ərzində postunu tərk edə biləcəyi ilə bağlı məlumatları “spekulyasiya” adlandırıb.
“Mən spekulyasiyalara şərh verə bilmərəm. Biz belə fərziyyələri dəfələrlə eşitmişik. Bu söhbətlər ancaq televiziyada olur. Mən heç bir məlumat eşitməmişəm”, - Papuaşvili “Pirveli” telekanalının sualına cavabında bildirib.
Bidzina İvanişvilinin siyasətə qayıdışından və “Gürcü Arzusu”nun fəxri sədri təyin edilməsindən sonra hakim partiya nizamnaməsində dəyişikliklər edib. Yeni nizamnaməyə görə, siyasi şura “Gürcüstanın baş nazirinin namizədliyini partiyanın fəxri sədrinin təqdimatı əsasında təsdiq edir”.
