Gürcüstan parlamenti ikinci oxunuşda 9 əleyhinə 75 lehinə səslə vergi məcəlləsinə ediləcək dəyişiklikləri dəstəkləyib, belə ki, ofşor zonadan əmlakın Gürcüstana köçürülməsi daha asan olacaq. “Gürcü Arzusu”nun təqdim etdiyi qanun layihəsinə parlamentdə sürətləndirilmiş qaydada baxılacaq. Müxalifət üzvləri dəyişikliklərin Bidzina İvanişvilinin maraqlarına xidmət etdiyini düşünürlər.
Əsas xəbərlər
“Qirçi”nin üzvü Aleksandre Rakviaşvili deyir ki, vergiləri aşağı salmaqla ofşorlardan pul asan şəkildə gəlmir, ən əsası etibarlı məhkəmənin olmasıdır.
“Məhkəmələrimizə güvənən insanlar kimlərdir? Aydın məsələdir ki, xarici investorlar çox olmayacaq. Bu qanunun kimə şamil edildiyini dəqiq bilmirəm, sadəcə onu bilirəm ki, çoxlu pulu olan, yəqin ki, təyyarəsi-filanı olan, bizim məhkəmə sisteminə güvənən, o qədər təsir gücünə malik olan bir şəxsdir ki, parlament belə bir dəyişikliyi sürətləndirilmiş qaydada qəbul edir”, - iqtisadiyyat elmləri doktoru Rakviaşvili deyib.
Rakviaşvili üçün vergi məcəlləsində bu cür mühüm dəyişikliyin sürətləndirilmiş şəkildə, iki gün ərzində edilməsi anlaşılmazdır. Deputat bu hissənin qanun layihəsindən çıxarılması və ayrıca baxılması təşəbbüsü ilə çıxış edib. “Əgər bu, doğrudan da investisiyaların cəlb olunmasına kömək edirsə, bu gün deyil, iyun ayında qanun qəbul edilsə, investisiya heç bir yerə qaçmayacaq”, - o deyib.
Deputat Roman Qotsiridzenin fikrincə, vergi məcəlləsində bu dəyişikliklərin qəbulu Gürcüstanı “qara pulların yuyulması” məntəqəsinə çevirə bilər.
“Bu dəyişikliklə biz qeyri-şəffaf yurisdiksiyalarda qeydiyyatdan keçmiş şirkətlərə yardım təqdim edirik. Biz çox yaxşı bilirik ki, ofşorlar mövcuddur, lakin indi son dövrlər müxtəlif üsul və vasitələrlə onların şəffaflığı daha əlçatan olub. Ona görə də oradan mülkün axacağı və bəzilərinin Gürcüstana gedəcəyi deyilir. Deyilən bu idi. Düşünürəm ki, Gürcüstanda bütün biznesmenlərinin ofşorda cəmdə nələrisə varsa, cənab Bidzina İvanişvilinin ondan daha çoxu var. Qoy daha çox olsun və Gürcüstana xərcləsin. Ona görə də problem ondadır ki, haradasa problemlər var idi və indi biz onların Gürcüstana daşınmasına kömək edək?”, - “Lelo”nun üzvü Davit Usupaşvili qeyd edib.
Qanun layihəsini onun təşəbbüskarlarından biri, Maliyyə və Büdcə Komitəsinin sədri Paata Kvijinadze təqdim edib. O, deyib ki, “xarici agentlər haqqında” qanun olmasaydı, vergi məcəlləsinə edilən dəyişikliklər müxalifətçi deputatların yadına düşməyəcəkdi.
“Bidzina bəy haqqında demək istərdim – bu mövzu haqqında ümumiyyətlə danışmaq istəmirdim – ilk növbədə, gətirib çıxarsa, nə olsun ki? Demirsiniz ki, bu qeyri-şəffafdır və ya nədirsə? Şəffaf olacaq. Gətirməsinin nəyi pisdir? Üstəlik, deyirəm ki sizə, burada 3000-ə yaxın şirkət var.
Mən adətən cənab Bidzina haqqında danışmaqdan çəkinirəm, amma Gürcüstanda yaxşı bir iş görülübsə - mən dövləti nəzərdə tutmuram – hər şeyi cənab Bidzina etməyibmi? Bircə bəyənəcəyiniz Mtatsminda parkıdır, mərhum cənab Badri [Patarkatsişvili] tərəfindən düzəldilib. Qalan hər şeyi cənab Bidzina etməyibmi? Kilsələr, teatrlar və ya hər nə olur olsun, Gürcüstana nə ödəyib deyirlər. Daha nə ödəməlidir?
Dediklərinizi təkrar edirəm, ən əsasını, ən böyük yalan nədir – hər şeyi bura köçürmək istəyirmiş, qorxurmuş ki, sanksiya tətbiq etməsinlər. Bundan böyük yalan fikirləşə bilməzdiniz, çünki Amerikadan, Avropadan sanksiya olarsa, kim olursa olsun, heç nə kömək edə bilməz, heç nə edə bilməz. Bütün banklarda sanksiya tətbiq olunacaq. Bu absurdur. Siyasidir, mövzunu gündəmə gətirmək, onun üzərində ilişib qalmaqdır, dünənkinin davamıdır. Bir daha deyirəm, bunun Bidzina bəyə heç bir aidiyyəti yoxdur, amma olsa belə, nə olsun ki? Pis nə olacaq? Hər şey şəffaf olur”, - Paata Kvijinadze bildirib.
Parlament dəyişiklikləri dünən birinci oxunuşda müzakirə edib və qəbul edib.
Qanun layihəsində nəzərdə tutulur ki, 2028-ci il yanvarın 1-dək güzəştli vergitutma olan ölkədə qeydiyyatdan keçmiş xarici müəssisənin bütün aktivləri (o cümlədən səhmləri) üzərində mülkiyyət hüquqları Gürcüstan müəssisəsinə verildikdə:
- Bu əməliyyat çərçivəsində ölkədə güzəştli vergitutma ilə qeydiyyatdan keçmiş xarici müəssisə və tərəfdaş fiziki şəxs tərəfindən əldə edilən gəlir/fayda mənfəət/gəlir vergisindən azad edilir;
- Aktivlərin/malların Gürcüstana daxil edilməsi/idxal rüsumundan azad edilir.
- Gürcüstan müəssisəsi 2030-cu ilin yanvarın 1-dək bu əməliyyat çərçivəsində əldə etdiyi aktivlə bağlı əmlak vergisindən azad edilir.
Bundan əlavə, güzəştli vergitutma ilə ölkədə qeydiyyatdan keçmiş xarici müəssisə və Gürcüstan müəssisəsindəki payın/səhmlərin 100%-i eyni fiziki şəxsə (fiziki şəxslər qrupuna) məxsus olmalıdır. Qanun yalnız güzəştli vergitutma olan ölkədə qeydiyyatdan keçmiş xarici müəssisəyə məxsus aktivin köçürülməsinə şamil edilir.
