"Ukrayna, Moldova, Gürcüstan və Balkanlar üçün geosiyasi səbəblər eyni dərəcədə vacibdir, biz üzvlük prosesini təmin etməliyik ki, bütün nəsil Avropa İttifaqının gözləmə zalında qalmasın", - Almaniyanın xarici işlər naziri Analena Berbok Berlində Avropa İttifaqının Genişlənmə Konfransında çıxışı zamanı bildirib.
Əsas xəbərlər
Onun sözlərinə görə, əgər Ukrayna, Moldova, Gürcüstan və Qərbi Balkan ölkələrinin uzunmüddətli perspektivdə Rusiya tərəfindən sabitliyi pozularsa, bu, Avropanın kənardan hücuma qarşı aciz qalması deməkdir.
“20 il əvvəl Salonikidə Avropa İttifaqı Qərbi Balkan ölkələrinə söz vermişdi ki, əgər müvafiq meyarları yerinə yetirsələr, Avropa İttifaqının qapıları onların üzünə açıq olacaq. 20 il əvvəl uşaq dünyaya gətirən valideynlər o zaman övladlarının Aİ-nin istənilən ölkəsində təhsil alacağına ümid edirdilər. Amma bu uşaqların indi 18, 19 və ya 20 yaşı var və bu uşaqların valideynləri nəinki arzularını gerçəkləşdiriblər, düzünü desəm, bəzi hallarda məyusluqlar olub.
Biz özümüzə sual verməliyik ki, üzvlük prosesinin baş tutmağını bütöv bir nəsil Aİ-nin gözləmə otağında qalmadan necə təmin edə bilərik.
Biz əmin olmalıyıq ki, bu ölkələrin əhalisinə, xüsusən də gənclərə ilkin mərhələdə, hətta onların ölkələri tamhüquqlu üzv olmamışdan əvvəl Aİ-nin üstünlüklərində iştirak etmək imkanı verilsin.
Biz bu imkanları artırmalıyıq. Niyə biz son mərhələdə olduğumuz ölkələri Şuranın iclaslarına müşahidəçi qismində dəvət etmirik? Məsələn, ümumi gələcək haqqında qərar qəbul etdiyimiz zaman. Əvəzində biz onları ildə bir dəfə komissiyanın hesabatlarını dinləməyə dəvət edirik. Əgər qonşuluğumuzun boz əraziyə çevrilməsini istəmiriksə, o zaman bu insanları indi masa arxasına qoymalıyıq. Ancaq eyni dərəcədə aydın olmalıdır və biz bir neçə həftə əvvəl Albaniyada da bu barədə danışmışdıq ki, bu mərhələli inteqrasiya albalı toplamaq demək deyil, çünki burada prinsipial məsələlərdən danışırıq. Avropa İttifaqı o zaman fəaliyyət göstərə bilər ki, bizim ümumi fundamental dəyərlərimiz - qanunun aliliyi, demokratiya həmişə Avropa İttifaqının möhkəm təməli olsun. Güclü tərəflərimizi müəyyən edən məhz budur”, - Analena Berbok bildirib.
Almaniya xarici işlər nazirinin sözlərinə görə, əgər bu ölkələrin uzunmüddətli perspektivdə Rusiya tərəfindən sabitliyi pozularsa, bu, "hamımızın xarici hücuma qarşı həssas olacağımız" mənasına gəlir.
“Moskva və prezident Putin Avropada öz imperiya məqsədlərini davam etdirməyə çalışacaqlar, bu isə təkcə Ukraynanın bizdən təcrid olunması deyil, həm də Moldovanın, Gürcüstanın və Qərbi Balkan ölkələrinin təcrid olunması deməkdir.
Biz Ukraynanı əmin edirik ki, yolun sonunda siz Avropa İttifaqının üzvü olacaqsınız, lakin biz həm də bu yolda maliyyə və ya siyasi baxımdan uğur qazanmanız üçün sizin yanınızdayıq.
Eyni şey Moldovaya da aiddir, o, fevralın 24-dək qazının böyük hissəsini Rusiyadan idxal edirdi, amma indi rekord sürətlə Rusiyanın asılılığından qurtula bildi.
Bu, bir çox insanın Aİ-yə gedən yolun düzgün olduğuna əmin olduğu, cəmiyyətin böyük bir hissəsinin Aİ-yə daxil olmaq arzusunu açıq şəkildə ifadə etdiyi Gürcüstana da eyni dərəcədə aiddir. Biz bu insanları tək qoymayacağıq.
Üzvlük prosesi avtomatik proses deyil”, - Berbok bildirib.
Noyabrın 8-də Avropa Komissiyasının Gürcüstana Aİ üzvlüyünə namizəd statusunun verilməsi ilə bağlı tövsiyə verib-verməyəcəyi məlum olacaq. Ötən il Avropa İttifaqı Ukrayna və Moldovaya Aİ üzvlüyünə namizəd statusu, Gürcüstana isə Avropa perspektivi verib və namizəd statusunun alınması üçün 12 bəndlik ilkin şərt qoyub. Komissiyanın Gürcüstanın müraciəti ilə bağlı hazırladığı rəyə siyasi qütbləşməyə son qoyulması, məhkəmə islahatlarının aparılması, deoliqarxizasiya, mütəşəkkil cinayətkarlıqla mübarizənin gücləndirilməsi, media azadlığının təmin edilməsi və s. daxildir.
