Berlində Gürcüstanın baş naziri İrakli Qaribaşvili ilə Almaniya kansleri Olaf Şolz arasında görüş keçirilib. Almaniya hökumətinin mətbuat xidmətinin məlumatına görə, tərəflər çoxtərəfli əməkdaşlığın genişləndirilməsi, təhlükəsizliyin və Avropa siyasətinin aktual məsələləri, Rusiyanın Ukraynada apardığı təcavüzkar müharibənin genişmiqyaslı nəticələri barədə fikir mübadiləsi aparıblar.
Əsas xəbərlər
Görüşdə federal kansler Almaniyanın Gürcüstana Avropaya inteqrasiya yolunda dəstəyini davam etdirdiyini vurğulayıb və Gürcüstan hökumətini islahatların həyata keçirilməsi üçün lazımi addımlar atmağa çağırıb.
Mətbuat xidmətinin məlumatına görə, Olaf Şolz qeyd edib ki, Avropa Komissiyasının tövsiyələri Avropa İttifaqına namizəd ölkə statusuna gedən yolu göstərir. O, Gürcüstan hökumətini maksimum səylə qarşıdakı həftələrdə lazımi tədbirlər görməyə çağırıb.
Təhlükəsizlik vəziyyətinə gəlincə, Federal Kansler bildirib ki, Almaniya Gürcüstanın beynəlxalq səviyyədə tanınmış sərhədləri daxilində suverenliyini və ərazi bütövlüyünü dəstəkləməyə davam edəcək. Kansler və Gürcüstanın Baş naziri açıq və nəticəyönümlü fikir mübadiləsini davam etdirmək və sıx əlaqə saxlamaq barədə razılığa gəliblər.
Gürcüstan hökumət administrasiyasının məlumatına görə, görüşdə İrakli Qaribaşvili Gürcüstanın Avropaya inteqrasiya yolunda atdığı addımlar, həyata keçirilən islahatlar və Avropa Komissiyasının 12 tövsiyəsinin həyata keçirilməsində mühüm irəliləyişlər barədə Olaf Şolsu məlumatlandırıb.
“Baş nazir Gürcüstana Avropa İttifaqına üzv dövlət statusunun verilməsinin vacibliyindən də danışıb və qeyd edib ki, Gürcüstan ilin sonunda namizəd statusunu gözləyir.
İclasda baş nazir həmçinin qeyd edib ki, Gürcüstan üçün üzv dövlətlərin həm siyasi, həm də praktiki dəstəyi ölkənin Avropa İttifaqına üzvlüyünün növbəti mərhələsi üçün kritik əhəmiyyət kəsb edir”, - Bu barədə Gürcüstan tərəfinin yaydığı bəyanatda deyilir.
İrakli Qaribaşvili Gürcüstanın Avropaya inteqrasiyasını həmişə açıq şəkildə dəstəklədiyinə görə Olaf Şolza təşəkkür edib.
Gürcüstanın baş naziri ilə Almaniya kansleri arasında görüş iyunun 2-də Almaniya hökuməti tərəfindən elan edilmişdi. Görüşdən sonra mətbuat konfransı keçirilməyib.
