“Formula” teleşirkətinin jurnalisti Sofio Qozalişvilinin parlamentdə akkreditasiyası bir ay müddətinə dayandırılıb. Parlament aparatı izah edir ki, jurnalist, deputat imtina etdiyi halda onunla müsahibəni dayandırmaq tələbini yerinə yetirməyib.
Əsas xəbərlər
“Kütləvi informasiya vasitələri nümayəndələrinin parlamentdə akkreditasiyası haqqında qaydanın 15-ci maddəsinin 2-ci bəndinin “c” yarımbəndinə əsasən, jurnalist Gürcüstan parlamentinin üzvü, Gürcüstan parlamentinin əməkdaşı və ya parlament bürosunu ziyarət edən bir şəxs müsahibə verməyi rədd edərsə, jurnalist müsahibəni dayandırmalıdır. 31 mart 2023-cü ildə siz yuxarıdakı yarımbbəndin tələbini pozmusunuz, bunu aprelin 1-də Şənbə Formulasında yayımlanan süjet sübut edir. Nəzərinizə çatdırırıq ki, jurnalist kimi akkreditasiyanız 2023-cü il mayın 3-dək 1 ay müddətinə dayandırılıb”, - parlament aparatının rəhbəri Ketevan Kvinikadzenin imzaladığı məktubda deyilir.
Efirdə yayımlandıqdan sonra Sofio Qozalişvilinin akkreditasiyasının dayandırıldığı süjet hakim partiyanın təbliğatçı telekanalı olan POS TV-nin təsisçisi və baş prodüseri Şalva Ramişvilinin qadınları sıxışdırmasından gedirdi. Jurnalist parlament üzvlərindən Ramişvilinin cəzalandırılmasının lazım olub-olmaması, onu dəstəkləyib-dəstəkləmədikləri ilə bağlı suallara cavab almağa çalışıb. Parlamentin Operativ Gender Bərabərliyi Şurasının sədri, “Gürcü Arzusu”nun üzvü Nino Tsilosani cavabdan yayınıb. O, jurnalistə “Reputasiyasından və partiya qərəzliliyindən irəli gələrək sizin televiziyanıza şərh vermirəm” deyib.
Parlament sədri Şalva Papuaşvili fevralın 6-da jurnalistlərə parlamentdə işlədikləri müddətdə məhdudiyyətlər qoyan sərəncam imzalayıb. Parlament jurnalisti müəyyən edilmiş qaydaları pozarsa, Aparat rəhbərinin qərarı ilə onun akkreditasiyası bir ay müddətinə, pozuntu təkrar olunduqda isə altı ay müddətinə dayandırılır.
