Tbilisi meriyası ilə Ədliyyə Nazirliyi arasında Tbilisi ərazisinin seçilmiş areallarında sistemli torpaq qeydiyyatı layihəsinin həyata keçirilməsini nəzərdə tutan qarşılıqlı əməkdaşlıq memorandumu imzalanıb. Bu barədə Tbilisi meri Kaxa Kaladze məlumat verib.
Əsas xəbərlər
Kaladzenin sözlərinə görə, bu gün Tbilisi ərazisində nə bələdiyyə, nə də digər maraqlı şəxslərin mülkiyyətlərini qeydiyyatdan keçirə bilmədiyi çoxlu sayda qeydiyyatsız torpaq sahələri var.
“Ədliyyə Nazirliyinin bütün ölkə üzrə həyata keçirdiyi bu proqrama paytaxt daxil deyildi. Müvafiq olaraq, qeyd olunan problemi həll etmək üçün bizə imkan verəcək memorandum imzaladıq. Layihə Dövlət Reyestri tərəfindən həyata keçiriləcək və onun maliyyə dəstəyi tam olaraq Tbilisi Bələdiyyəsi tərəfindən təmin olunacaq. Müvafiq olaraq, sözügedən layihə çərçivəsində mülkiyyət hüquqlarının qeydiyyatı tamamilə pulsuz həyata keçiriləcək.
Layihənin icrası nəticəsində seçilmiş ərazilərdə mülkiyyət və ədalətli mülkiyyət hüququnu, habelə özbaşına zəbt olunmuş torpaq sahələrinin statusunu müəyyən edən sənədlər əsasında minlərlə vətəndaşın mülkiyyət hüquqları qeydə alınacaq. “Söhbət 27 000-dən çox torpaq sahəsindən gedir”, - Kaladze bildirib.
Torpaqların sistemli qeydiyyatı layihəsi mərhələli şəkildə həyata keçiriləcək və 2024-cü il dekabrın 31-dək başa çatacaq. Kaladzenin sözlərinə görə, bu mərhələdə bir neçə problemli yer seçilib - Didqori, Köhnə Vedzis, Diğomi, Kveseti, Betania, Tskneti, Axaldaba, Kiketi-Sağorisi, Kojori, Tsavkisi, Şindisi və Tabaxmela.
