“Sərhədsiz Reportyorlar” beynəlxalq təşkilatının (RSF) mətbuat azadlığı reytinqində Gürcüstanın mövqeyi 26 pillə pisləşərək 180 ölkə arasında 103-cü yerdə qərarlaşıb. 2024-cü il üçün Gürcüstanda medianın vəziyyəti “çətin” kimi qiymətləndirilir.
Əsas xəbərlər
Hesabata görə, Şərqi Avropa və Mərkəzi Asiyada, xüsusilə Belarus, Gürcüstan, Qırğızıstan və Azərbaycanda media senzurası Rusiyanın repressiv üsullarını effektiv şəkildə təqlid etməklə gücləndirilib.
“Əhəmiyyətli eniş yaşayan ölkələr arasında 26 pillə geriləyən Gürcüstan (103-cü yer) var. Hakim partiya cəmiyyəti qütbləşdirməyə davam edir, özünü Moskva ilə uzlaşdırmağa çalışır və getdikcə mətbuat azadlığına düşmən olan siyasət həyata keçirir”, - təşkilatın hesabatında deyilir. 2023-cü ildə Gürcüstan mətbuat azadlığı indeksinə görə 77-ci yerdə idi.
Gürcüstanın vəziyyəti, həmçinin fiziki, psixoloji və ya peşəkar zərər riski olmadan məlumatı müəyyən etmək, toplamaq və yaymaq qabiliyyətini qiymətləndirən təhlükəsizlik göstəricisi ilə də pisləşir. Hesabata görə, Gürcüstanda müstəqil və müxalif mediaya qarşı mühit, jurnalistlərə qarşı şifahi və fiziki hücumların artması, müstəqil medianı marginallaşdırmağa və azad söz məkanını sıxışdırmağa yönəlmiş qanunların qəbuluna cəhdlərlə düşmən tipli olaraq qalır.
Qonşu ölkələrə gəlincə, Azərbaycan 164-cü, Rusiya 162-ci, Türkiyə 158-ci, Ermənistan 43-cü yerdədir. Azərbaycan timsalında bütün göstəricilərin pisləşməsi müşahidə oluna bilər ki, bu da təşkilatın fikrincə, prezident seçkiləri öncəsi media reydlərinin nəticəsidir.
Çin mətbuat azadlığı reytinqində 172-ci yerdədir və təşkilata görə, bu, “jurnalistlər üçün dünyanın ən böyük həbsxanasıdır”. “Onun rejimi bütün dünyada jurnalistikaya və məlumat hüququna qarşı repressiya kampaniyası aparır”, - Sərhədsiz Reportyorlar qeyd edir.
Reytinqdə ən yaxşı nəticələr Avropa ölkələridir. İlk beşlikdə Norveç, Danimarka, İsveç, Hollandiya və Finlandiya yer alır.
