Rusiya işğalçı qüvvələrinin nümayəndələri Kareli bələdiyyəsinin Knolevi kəndi yaxınlığında iki Gürcüstan vətəndaşını qanunsuz olaraq həbs ediblər. Dövlət Təhlükəsizliyi Xidmətinin məlumatına görə, həbs işğal olunmuş ərazidə həyata keçirilib.
Əsas xəbərlər
“Qeyri-qanuni olaraq həbs edilən Gürcüstan vətəndaşlarının tezliklə azad edilməsi üçün bütün mövcud mexanizmlər işə salınıb”, - DTX-dan bildirilib.
Tsxinvalinin de-fakto hakimiyyəti də həbslə bağlı məlumat yayıb. Qondarma Dövlət Təhlükəsizlik Komitəsinin məlumatına görə, fevralın 15-də qondarma sərhəddə “vandalizm” baş verib. Xüsusilə, Gürcüstanın iki vətəndaşı “Cənubi Osetiya ərazisinə qeyri-qanuni keçərək dövlətlərarası bölgü xəttinin mühafizəsi və təhlükəsizliyi üçün istifadə olunan mühəndis qurğularına ziyan vurublar”.
“Qanun pozucuları öz qanunsuz hərəkətlərini cib telefonunun kamerası ilə, yəqin ki, regionda yerləşən Avropa, o cümlədən LGBT dəyərləri təqdim edən və Cənubi Osetiya və Gürcüstanda seçki kampaniyaları öncəsi vəziyyətin destabilizasiyasına çalışan qərbyönlü qeyri-kommersiya təşkilatlarının kuratorlarına təqdim etmək üçün lentə alıblar”, - Qondarma “Təhlükəsizlik Komitəsi” bildirir və saxlanılanların sərxoş olduqlarını qeyd edir.
Hazırda Tsxinvalidə 7 Gürcüstan vətəndaşı qanunsuz həbsdədir. Onların arasında 2023-cü ilin noyabrın 24-də Qori bələdiyyəsinin Adzvi kəndinin kilsəsindən rus hərbçiləri tərəfindən qaçırılan Dimitri Korinteli və Qiorqi Meladze də var. Kilsə işğal xəttinin o tayındadır.
Laşa Xetereli və Qiorqi Mosiaşvili də Tsxinvali həbsxanasındadır. Liaxvi vadisindən olan qaçqın Laşa Xetereli artıq səkkizinci dəfədir ki, işğal rejimi tərəfindən saxlanılıb. Son olaraq, o, 2023-cü il iyulun 5-də işğal altında olan Disev kəndi yaxınlığında həbs edilib. Bundan əvvəl Xetereli bir ildən çox qanunsuz olaraq Tsxinvali həbsxanasında saxlanılıb. Onun işğal olunmuş ərazidə qohumları var. 2008-ci il müharibəsindən sonra Şaumiani köçkün qəsəbəsində yaşayır. 31 oktyabr 2023-cü ildə rus əsgərləri Perevi kənd sakini Qiorqi Mosiaşvilini Sinaquri kəndi yaxınlığında qaçırıblar.
2021-ci ilin dekabrında işğalçılar Qori bələdiyyəsinin Nikozi kəndi yaxınlığında keçmiş hərbi qulluqçu Mamuka Çxikvadzeni həbs ediblər. Onu qondarma sərhədi qanunsuz keçmə ilə yanaşı, narkotik qaçaqmalçılığında da ittiham edirlər. 2022-ci ilin mayında de-fakto məhkəmə Çxikvadzeni 5.6 il müddətinə azadlıqdan məhrum edib, onun yerli vəkili qərardan apellyasiya şikayəti verib və qanunsuz cəza 3,8 ilə endirilib.
