Rusiya Federal Təhlükəsizlik Xidməti oktyabrın 8-də Krım körpüsündə baş verən partlayışla bağlı davam edən istintaq çərçivəsində 8 nəfərin həbs edildiyini açıqlayıb. Onlardan beşi Rusiya, üçü isə Ukrayna və Ermənistan vətəndaşıdır. İdarə bildirir ki, partlayıcı qurğunun daşınması prosesində iki Gürcüstan vətəndaşı da iştirak edib.
Əsas xəbərlər
Rusiya partlayışı terror kimi araşdırır. Federal Təhlükəsizlik Xidmətinin məlumatına görə, cinayətin təşkilatçısı Ukrayna Müdafiə Nazirliyinin Baş Kəşfiyyat İdarəsi, onun rəhbəri Kirill Budanov, həmçinin bölmənin əməkdaşları və agenturası olub.
“FSB”nin məlumatına görə, körpüdə partlayan bomba tikinti polietilen rulonlarında maskalanıb və ümumi çəkisi 22 770 kiloqram olub. İstintaqın versiyasına görə, avqustun əvvəlində yük Odessa limanından Bolqarıstanın Ruse adlı liman şəhərinə göndərilib, oradan əvvəlcə Gürcüstanın Poti limanına, oradan isə Ermənistana gəlib.
“Ukrayna vətəndaşları Mixail Tsiurkalo (1975-ci il təvəllüdlü), Denis Kovaç (1979) və Roman Solomko (1971), Gürcüstan vətəndaşları Sandro İnosaridze, broker Levan və Ermənistan vətəndaşı Artur Terçanyan (1985) Bolqarıstandan Poti limanına, sonra isə yüklərin Ermənistana daşınmasının təşkilində iştirak ediblər”, - Federal Təhlükəsizlik Xidməti bildirib.
Onların məlumatına görə, sentyabrın 29-dan oktyabrın 3-dək Ermənistanda “Transalyans” terminalında yüklər “Avrasiya İqtisadi İttifaqı”nın qaydalarına uyğun olaraq gömrük rəsmiləşdirilməsindən keçirilib və sənədlər dəyişdirilib. Nəticədə yükgöndərən kimi Ermənistan şirkəti, alıcı kimi isə Rusiya şirkəti imzalanıb. İstintaqın məlumatına görə, oktyabrın 4-də yük Rusiya-Gürcüstan sərhədini “Yuxarı Lars”da DAF qeydiyyatlı yük maşını ilə keçib. Oktyabrın 6-da o, Krasnodar vilayətindəki Armavir topdansatış bazasına gətirilib və orada yerləşdirilib. “FSB”nin məlumatına görə, oktyabrın 7-də Ukrayna vətəndaşı Roman Solomkonun köməyi ilə, Ukrayna vətəndaşı Vladimir Zloba və daha 5 Rusiya vətəndaşının yük sənədləri yenidən dəyişdirilib və göndərici “TEK-34” MMC (Ulyanovsk) olub. Alıcı isə Krımda mövcud olmayan bir şirkət. Həmin gün yük Krımın əsas şəhəri Simferopol istiqamətində hərəkət edən Rusiya vətəndaşı Mahir Yusubovun yük maşınına ötürülüb. “FSB”nin məlumatına görə, oktyabrın 8-də səhər saat 06:03-də Krım körpüsündən keçərkən partlayış baş verib.
“Bütün marşrut üzrə yüklərin hərəkətinə nəzarət və cinayət sxeminin iştirakçıları ilə əlaqə Ukrayna Müdafiə Nazirliyinin Baş Kəşfiyyat İdarəsinin əməkdaşı tərəfindən həyata keçirilib”, - “FSB” bildirib.
İdarənin məlumatına görə, istintaq davam edir və bütün təşkilatçılar və iştirakçılar, həmçinin xarici ölkələrin vətəndaşları “Rusiya qanunvericiliyinə uyğun olaraq cinayət məsuliyyətinə cəlb olunacaqlar”.
Oktyabrın 8-də Krım körpüsündə baş verən partlayışdan az sonra Rusiyanın Milli Antiterror Komitəsi yük maşınının partlaması, bunun ardınca yanacaq çənləri ilə dolu qatarın alovlanması barədə məlumat verib. Nəticədə 3 nəfər ölüb, tikilinin bir hissəsi dağılıb. Körpüdə nəqliyyatın hərəkəti müvəqqəti olaraq dayandırılıb. Ukrayna mediası öz mənbələrinə əsaslanaraq yazıb ki, partlayış Ukrayna Təhlükəsizlik Xidmətinin əməliyyatı nəticəsində baş verib. Xidmət bu məsələyə münasibət bildirməyib.
Rusiya İstintaq Komitəsinin sədri Aleksandr Bastrıkin oktyabrın 9-da prezident Putinlə görüşü zamanı partlamış yük maşınının marşrutunun müəyyən edildiyini və onun Bolqarıstan, Gürcüstan, Ermənistan, Şimali Osetiya və Krasnodar vilayətində olduğunu bildirib. Bolqarıstan hökuməti cavab olaraq bildirib ki, partlayışda iştirak edən yük maşını heç vaxt onların ərazisində olmayıb.
Krımın ilhaqından sonra Rusiya 2016-2019-cu illərdə Kerç boğazı üzərində avtomobil və dəmir yolu körpüsünü tikib. 2022-ci il fevralın 24-də müharibə başlayandan Rusiya Ukraynanın cənubundakı qoşunlarını təchiz etmək üçün ondan istifadə edir.
