Tbilisi Dövlət Universitetinin rektoru Giorgi Şarvaşidze tutduğu vəzifədən istefa verib. Sabiq rektor diplomatik korpusda fəaliyyətini davam etdirəcək.
Əsas xəbərlər
“Qərarı çoxdan vermişəm. Bu barədə universitet ictimaiyyəti məlumatlandırılıb. Avropa Universitetləri Assosiasiyası tərəfindən universitetimizin institusional qiymətləndirilməsinin nəticələri və digər mühüm xəbərlər məlum olduqdan sonra qərarımı Şuraya bildirdim. Gələcək işim beynəlxalq münasibətlərlə bağlı olsa da, mən universitetin professoru və böyük tərəfdaşı olaraq qalıram”, - Giorgi Şarvaşidze yazıb.
Giorgi Şarvaşidze TDU-nun rektoru vəzifəsinə ilk dəfə 2016-cı ildə, ikinci dəfə isə 2020-ci ilin avqustunda seçilib. Onun səlahiyyət müddəti 2024-cü ildə başa çatacaqdı. G. Şarvaşidzenin rektor vəzifəsindən istefası əsas tələblərdən biri olub və buna görə də 2022-ci ilin aprelində tələbələr etiraz aksiyalarına başlayıblar. Tələbələr həmçinin rektorun seçilmə yolunun dəyişdirilməsini, Tbilisi Dövlət Universitetinin büdcəsinin dərhal tam yoxlanılmasını, yataqxana tikilməsini tələb ediblər. İyunun 10-da aksiyalarda iştirak edən tələbələr rektorun kabinetinə zorla giriblər.
Giorgi Şarvaşidzeni Tbilisi Dövlət Universitetinin sosiologiya kafedrasının müdiri İaqo Kaçkaçişvili dissertasiyasında plagiatda ittiham edib. Şarvaşidze 2003-cü ildə Sulxan-Saba Universitetində namizədlik dissertasiyası müdafiə edib. Bu universitetin hüquqi varisi İliya Dövlət Universiteti plagiat faktını təsdiqləyib: “Giorgi Şarvaşidzenin dissertasiyasında yuxarıda adı çəkilən broşürün əsas mətni (“Ali təhsildə struktur islahatları və Gürcüstanın özəl ali təhsil müəssisələrinin inkişaf tendensiyaları”) tamamilə təkrarlanır (başlıq səhifəsi və üçüncü səhifə olmadan), bu da 34% təşkil edir. Sözügedən broşuranın mətni dissertasiyada istinadsız və biblioqrafiyada istinadlar olmadan əks etdirilir. Aşkar edilmiş vəziyyət plagiat anlayışına uyğundur”.
Bir neçə gün əvvəl prokurorluq Tbilisi Dövlət Universitetinin mühasibini və daha bir şəxsi həbs edib. Prokurorluğun məlumatına görə, universitetin keçmiş mühasibi bu vəzifədə işləyərkən öz rəsmi statusundan istifadə edərək universitetin hesabından ona aidiyyəti olan şəxslərin bank hesablarına 165 000 lari keçirərək mənimsəyib.
İstintaq həmçinin müəyyən edib ki, təqsirləndirilən şəxslə cinayət əlaqəsi olan şəxs TBC Bankı aldadıb. Deyib ki, güya, o, universitetdə müxtəlif vəzifələrdə çalışıb, nəticədə qanunsuz olaraq 105 min lari kredit alıb. Cinayət 7 ildən 11 ilədək azadlıqdan məhrum etmə ilə cəzalandırılır
