ე.წ. აფხაზეთის დროშის დაწვის გამო დაკავებულ ირაკლი ბებუას  30 მარტს გაათავისუფლებენ

ამასთან, კიუტი უარყოფს მედიაში გავრცელებულ ინფორმაციას, რომ „აფხაზეთის სახელმწიფო დროშის დაწვისთვის მსჯავრდებული“ საპატიმროს დადგენილ ვადაზე ადრე დატოვებს.

„ბებუა დაკავებული იქნა 2020 წლის 30 სექტემბერს. მან ჩაიდინა სახელმწიფო დროშის დაწვის აქტი, რისთვისაც სისხლის სამართლის პასუხისმგებლობა დაეკისრა და 9 წლით თავისუფლების აღკვეთა მიესაჯა. ჯამში 4 წელი და 6 თვე უნდა მოეხადა. 30 მარტს მას წინასწარი დაკავების იზოლატორში ყოფნის ვადა ეწურება. შესაბამისად, ჩვენ ვალდებულები ვიქნებით გავათავისუფლოთ იგი. არავინ აპირებდა მის ვადაზე ადრე გათავისუფლებას“, - განაცხადა ე.წ. შინაგან საქმეთა მინისტრმა.

„თავისუფლების აღკვეთის ვადების გამოთვლის დროებითი წესის შესახებ“ აფხაზეთის ე.წ. კანონის მიხედვით, მსჯავრდებულებს, რომლებსაც საერთო რეჟიმის კოლონიებში თავისუფლების აღკვეთა მიესაჯათ, თუმცა სასჯელს იხდიან დროებითი მოთავსების და წინასწარი დაკავების იზოლატორებში, მოხდილი სასჯელის ერთი დღე უდრის ორ დღეს.

ირაკლი ბებუამ აფხაზეთის ე.წ. სახელმწიფო დროშა 2020 წლის 30 სექტემბერს, ქალაქ გალში დაწვა იმ დროს, როდესაც  „1992-1993 წლების სამამულო ომში“ აფხაზი ხალხის გამარჯვებისადმი მიძღვნილი ღონისძიება იმართებოდა. აფხაზეთის დე ფაქტო სამართალდამცავმა უწყებებმა დაკავებულის სახლში ჩხრეკა ჩაატარეს, რის შედეგადაც ამოიღეს ხელყუმბარა, რომელსაც ის, თითქოსდა, საკუთარი საწოლში ბალიშის ქვეშ ინახავდა. სოციალურ ქსელში გავრცელებულ ვიდეოში, რომელიც სავარაუდოდ დაკითხვის დროს იყო გადაღებული, ბებუა ამბობდა, რომ დროშა შეგნებულად დაწვა.

დე ფაქტო ხელისუფლება ბებუას სისხლის სამართლის კოდექსის რამდენიმე მუხლით გათვალისწინებული დანაშაულის ჩადენას ედავებოდა, მათ შორის, სახელმწიფო სიმბოლიკის შეურაცხყოფას, ქონების განზრახ დაზიანებას ან განადგურებას დამამძიმებელ გარემოებებში და იარაღის უკანონო შენახვას. 2020 წლის დეკემბერში, მას 9 წლით თავისუფლების აღკვეთა მიუსაჯეს.