21 წლის მამაკაცის თქმით, ქუჩაში ჩხრეკის დროს პოლიციამ მასზე იძალადა

ახალგაზრდა მამაკაცს დაზიანებები კისერზე, მკლავსა და ხელის მტევნებზე აღენიშნება.

„არ მითხრეს, თუ რატომ, რის გამო გამაჩერეს. ვინ იყვნენ, ესეც არ მითხრეს. დაიწყეს ზედაპირული შემოწმება და ზედმეტები გააკეთეს, „ტრუსიკიც“ გამოწიეს და ჩამხედეს. ვუთხარი, რომ ხელი გაეწიათ. გაღიზიანდნენ. თურმე, სიტყვები „ხელის გაწევა“ პოლიციისთვის შეურაცხყოფის მიყენებაა და პოლიციას ეგრე არ უნდა ვესაუბრო. ყვირილი დაიწყეს და ჩამტენეს მანქანაში. ერთი კისერზე მიჭერდა და მგუდავდა, წინააღმდეგობა როგორ უნდა გამეწია?! შიგნით მანქანაშიც მგუდავდნენ. თავში მირტყეს. როცა მანქანაში ჩამსვეს, ბორკილები დამადეს რომ არ გავნძრეულიყავი, ორ კაცს უკან ვეჭირე და ერთი მირტყამდა. თავიდან იმ ორმა, ვინც ჩვენთან შემოწმებაზე მოვიდნენ, შეურაცხყოფა მომაყენეს და მანქანაში ერთ-ერთმა მცემა. ერთი საჭესთან იჯდა და მეორე მირტყამდა. გინებითაც მაგინეს“, - ამბობს ლაშა ჟღენტი ჟურნალისტებთან.

მომხდარს დაზარალებულის ძმა, მეგობარი და ბებიაც შეესწრნენ. ლუკა ჟღენტი ამბობს, რომ პოლიციელებმა არ უთხრეს, სად მიჰყავდათ მისი ძმა. როგორც მოგვიანებით გაირკვა, ახალგაზრდა მამაკაცი ადმინისტრაციული წესით, პოლიციის კანონიერი მოთხოვნისადმი დაუმორჩილებლობის მუხლით იყო დაკავებული.

ლაშა ჟღენტის სასამართლო პროცესი თბილისის საქალაქო სასამართლოში დაკავებიდან რამდენიმე საათში გაიმართა. ადვოკატ კახაბერ ჩუბინიძის თქმით, პროცესი მათი შუამდგომლობის საფუძველზე გადაიდო.

„სასამართლომ გონივრული ვადა მოგვცა იმისთვის, რომ მტკიცებულებები წარვადგინოთ. მიგვაჩნია, რომ დაკავების დროს პოლიციელებმა თავიანთ უფლებამოსილებებს გადაამეტეს და ლაშას ფიზიკური შეურაცხყოფა მიაყენეს. მას ოთხი საათი ვეძებდით, რადგან პოლიცია ადგილსამყოფელს გვიმალავდა“, - განაცხადა ჩუბინიძემ.

ადვოკატის თქმით, მომხდართან დაკავშირებით შსს-ს გენერალურ ინსპექციას და სპეციალურ საგამოძიებო სამსახურს მიმართეს.