„ქართული ოცნების“ მთავრობის ადმინისტრაციასთან 45-დღიანი უწყვეტი პროტესტისა და ღამისთევის შემდეგ, 3 ივნისს, დიუშენის კუნთოვანი დისტროფიის მქონე ბავშვების მშობლები „ოცნების“ მთავრობის მეთაურს ირაკლი კობახიძეს შეხვდნენ. დაახლოებით ორსაათიანი მოლაპარაკებების დასრულების შემდეგ, მშობლებმა პროცესი იმედის მომცემად შეაფასეს და განაცხადეს, რომ უახლოეს მომავალში სპეციალური სამუშაო ჯგუფი შეიქმნება.
ახალი ამბები
მკითხველის რჩეული
- 1 გორში პოლიციელების მიერ ნაცემი პირი წინააღმდეგობის გაწევის ბრალდებით დააკავეს
- 2 გიგა ავალიანის საქმე: დემეტრე ჩიქოვანს 9 წელი და 9 თვე, ანი ნასყიდაშვილს 5 წელი და 3 თვე მიესაჯა
- 3 პროკურატურამ გორში ნაცემი პაპუნა ლოცულაშვილისთვის ბრალის წარდგენაზე უარი თქვა
- 4 6 პოლიციელი დააკავეს გორში მოქალაქეებზე ძალადობის ბრალდებით
- 5 „ყველა სცემდა, ვინც მოვიდა“ - გორში პოლიციელებმა მოქალაქეები სასტიკად სცემეს
- 6 „პოლიციელს ქვით დაუზიანა ჯანმრთელობა“ – შს მინისტრის მოადგილე გორში ძალადობაზე
„დეტალურად გადავეცით ინფორმაცია მედიკამენტებთან, მიმდინარე პროცესებთან და იმასთან დაკავშირებით, თუ რატომ გახდა საჭირო უწყვეტი აქციის გამართვა მთავრობის სასახლის წინ. ასევე მივაწოდეთ ინფორმაცია იმასთან დაკავშირებით, რომ ჩვენი პროცესები არ არის პოლიტიკურად მართული. არანაირი კომუნიკაცია ჩვენ არ გვქონდა ფარმაცევტულ კომპანიებთან და ძალიან ცუდად ჟღერდებოდა, თითქოს, რომელიმე მშობელი ან ორგანიზაცია ფარმაცევტული მაფიის მართული იყო. ამ კითხვებსაც გაეცა პასუხი“, - განაცხადა ორგანიზაცია „ერთად ვებრძოლოთ დიუშენის კუნთოვან დისტროფიას“ თავმჯდომარემ, ზაქარია გვიშიანმა.
კიდევ ერთი მშობლის, კახა წიქარიშვილის თქმით, მათ ჰქონდათ მოლოდინი, რომ შეხვედრიდან კონკრეტულ სამოქმედო გეგმას გამოიტანდნენ, თუმცა გარკვეულ პრეპარატებთან დაკავშირებით აზრთა სხვადასხვაობა დაფიქსირდა. მოლაპარაკებები ზეგ დილით გაგრძელდება.
„ვიმედოვნებთ, რომ შემდეგი შეხვედრა ზეგ დილით, პირადად მასთან [კობახიძესთან], უკვე იქნება კონკრეტულ მედიკამენტებზე - როგორ და რანაირად შემოვიდეს ქვეყანაში უმოკლეს დროში.
ვიმედოვნებთ, რომ გავლენ კომუნიკაციაზე ფარმაცევტულ კომპანიებთან და ეტაპობრივად დაიწყება მედიკამენტების შემოტანა“, - აღნიშნა თაკო გოგალაძემ.
შეხვედრას ესწრებოდა „ქართული ოცნების“ მთავრობის ჯანდაცვის მინისტრი მიხეილ სარჯველაძეც, რომელმაც მშობლების მიერ მოთხოვნილი ოთხი მედიკამენტის სტატუსზე ისაუბრა:
„დასახელებული მედიკამენტებიდან ორთან დაკავშირებით ნაკლები კითხვები არსებობს, ხოლო სხვებთან მიმართებით კითხვები მეტია“.
„ბუნებრივია, ხაზი გაესვა იმ გარემოებას, რომ უპირველესად, ჩვენ ერთმნიშვნელოვნად ვართ განწყობილი საიმისოდ, რომ რაც შეიძლება სწრაფად და ეფექტიანად მოინახოს გადაწყვეტილებები, რომლებიც რეალურად სასარგებლო იქნება თითოეული პაციენტისთვის. ამ საკითხებზე მსჯელობა გაგრძელდება და რა წამს იქნება მზად გადაწყვეტილება, ყოველგვარი დაყოვნების გარეშე იქნება მიღებული“, - თქვა მიხეილ სარჯველაძემ.
ირაკლი კობახიძემ განაცხადა, რომ შეხვედრის მიზანი მოსაზრებებისა და ინფორმაციის გაცვლა იყო. მისი თქმით, საკითხი ძალიან მგრძნობიარეა და გადაწყვეტილებისას პირველ რიგში ბავშვების ინტერესებიდან უნდა ამოვიდნენ.
„ეს იყო დღევანდელი შეხვედრის მიზანი. თავიდანვე შევთანხმდით, რომ უახლოეს მომავალში, მაქსიმუმ ზეგ დილით შედგება მეორე შეხვედრა, სადაც უკვე იმედი გვაქვს, რომ ერთად დავსახავთ საკითხის გადაჭრის გზებს. იმედი მაქვს, რომ ამ საკითხს ერთობლივად გადავწყვეტთ“, - აღნიშნა კობახიძემ.
ამ დროისთვის მშობლები მთავრობის ადმინისტრაციასთან რჩებიან. პროტესტის გაგრძელება-შეწყვეტის საკითხი მომდევნო შეხვედრის შედეგების მიხედვით გადაწყდება.
საქართველოში დიუშენის სინდრომის დიაგნოზით 100-მდე ადამიანია რეგისტრირებული, რომელთა უმრავლესობა ბავშვია. მშობლები უკვე ორი წელია სახელმწიფოსგან იმ თანამედროვე მედიკამენტების დაფინანსებას ითხოვენ, რომლებსაც დაავადების პროგრესირების მნიშვნელოვნად შენელება და სიცოცხლის გახანგრძლივება შეუძლიათ.
20 აპრილიდან მშობლების ნაწილმა მთავრობის ადმინისტრაციასთან უწყვეტი პროტესტი დაიწყო. 1-ელ ივნისს მათ „ქართული ოცნების“ საპატიო თავმჯდომარეს, ბიძინა ივანიშვილს ღია წერილით მიმართეს, რის შემდეგაც კობახიძემ მათთან შეხვედრის გადაწყვეტილება მიიღო. აღსანიშნავია, რომ 20 მაისს კობახიძემ განაცხადა, რომ წამლებისთვის გამოსაყოფი თანხა „ხალხის ფულია და ის რაციონალურად უნდა დაიხარჯოს“. საზოგადოებრივი სოლიდარობის ნიშნად, სტუდენტური მოძრაობა „დაიცავი ილიაუნის“ ინიციატივით, ბავშვების დასახმარებლად 2 000 000 ლარი უკვე შეგროვდა.
