აქციების მონაწილე პედიატრი, კონსტანტინე ჩახუნაშვილი დააკავეს

„საღამოს, როდესაც აქციაზე მიდიოდა, სახლთან ახლოსვე, ნუცუბიძის ქუჩაზე, როგორც ჩანს, აიყვანეს პირდაპირ მანქანიდან. ჩვენ საერთოდ არ ვიცოდით საიდან აიყვანეს. უბრალოდ, კონტაქტზე რომ არ გამოვიდა სადღაც 40 წუთზე მეტი, წავედით დაახლოებით იმ ტრაექტორიით, რა გზითაც კოტე დადის ხოლმე და გზაში ვიპოვეთ გაჩერებული მანქანა ისეთ ადგილზე, სადაც ერთი კამერა არ არის. დიდი ალბათობით, ადამიანი ქუჩიდან პირდაპირ მოიტაცეს“, - თქვა დაკავებულის ძმამ, დავით ჩახუნაშვილმა ტელეკომპანია „ფორმულას“ ეთერში.

კონსტანტინე ჩახუნაშვილი დიღმის იზოლატორშია გადაყვანილი.

გუშინ სოციალურ ქსელში გავრცელდა ინფორმაცია, რომ კრიმინალური პოლიციის თანამშრომლებმა კონსტანტინე ჩახუნაშვილს სახლში მიაკითხეს და ერთ-ერთ სისხლის სამართლის საქმესთან დაკავშირებით გამოკითხვაზე დაიბარეს. მან განყოფილებაში მისვლაზე უარი თქვა და სასამართლოში, მაგისტრი მოსამართლის თანდასწრებით გამოკითხვაზე უნდა მისულიყო. დავით ჩახუნაშვილი ვარაუდობს, რომ შსს-ს გუშინვე სურდა მისი ძმის დაკავება.

„ბევრი დავხვდით ადგილზე და ვეღარ გაბედეს. ის ალბათ დააკავებს იმავე საფუძვლით, რა საფუძვლითაც აკავებენ ყველა სხვა აქტიურ მოქალაქეს. ცდილობენ ყველა ადამიანს მოუძებნონ რაღაც ხელჩასაჭიდი და ან დააშინონ, ან დააკავონ ან ცოტა ხნით გამოთიშონ აქტივობიდან. რაც ქვეყანაში ხდება, მგონი, კითხვა არავის უნდა გაუჩნდეს, რომ ბიძინა ივანიშვილის რეჟიმმა გააფორმა დიქტატურა“, - აღნიშნა დავით ჩახუნაშვილმა.

კონსტანტინე და დავით ჩახუნაშვილები სოციალურ ქსელ Instagram-სა და Facebook-ში პოპულარული გვერდის „პედიატრი ძმების“ ავტორები არიან. გარდა ამისა კონსტანტინე ჩახუნაშვილი მოძრაობა „ჯიუტის“ წევრიცაა.