აფხაზეთი არ ვითარდება, ის უბრალოდ კვდება, რადგან პუტინს ეს სურდა - ზელენსკი

„მაგალითად, საქართველო, რომელიც ევროკავშირისა და ნატოსკენ მიდიოდა, ახლა რუსეთს უბრუნდება, მიუხედავად იმისა, რომ მათ აქვთ გაყინული კონფლიქტები. მათ აფხაზეთში აქვთ ის, რაც ჩვენ გვაქვს დონბასში, რომელსაც ბოევიკები აკონტროლებენ.

აფხაზეთი არ ვითარდება. ის უბრალოდ საქართველოს ძალიან ლამაზი მხარეა, რომელიც კვდება. თუ ოდესმე გექნებათ იქ ჩასვლის საშუალება, მიხვდებით, რომ ის უბრალოდ კვდება, რადგან პუტინს ეს სურდა. მას სურდა, მათთვის განვითარების საშუალება არ მიეცა. გაყინული კონფლიქტი ნიშნავს, რომ არ მიგიღებენ ევროკავშირში და, რა თქმა უნდა, არ მიგიღებენ ნატოში, რადგან, დიახ, გაყინული კონფლიქტის გამო არ მიგიღებენ.

ეს არის ის, რაც პუტინმა გააკეთა. მისთვის ძალიან მნიშვნელოვანია, რომ არ დაკარგოს ეს გავლენა. სწორედ მან მიაბრუნა უკან საქართველო. ახალგაზრდები, სტუდენტები, ყველა მიდის და ეს ფაქტია. საქართველო საკმაოდ პატარაა. ისინი მიდიან, უნდათ იცხოვრონ ევროპაში და სურთ განვითარდნენ - ვიღაც შეერთებულ შტატებში, ვიღაც ევროკავშირში, ვიღაც ბრიტანეთში“, - განაცხადა ზელენსკიმ.

უკრაინის პრეზიდენტის თქმით, პუტინის შემდეგი სვლა მოლდოვაში იქნება - აპრილში ის „მოლდოვის პარლამენტისთვის იბრძოლებს“.

„ის დაიწყებს ევროპისგან მოლდოვის დაშორებას, მიუხედავად იმისა, რომ მათ [მოლდოველებს] უნდათ იქ წასვლა. მას ეს არ აინტერესებს. იქნება პრორუსული პარტია და რაღაცას გაუკეთებენ დღევანდელ პრეზიდენტს, რადგან მან არჩევნები მოიგო, არის პროევროპელი, მაგრამ ის [პუტინი] ამას შემოაბრუნებს. შემდეგი ნაბიჯები სრულიად ნათელია - ის ყველაფერს გააკეთებს იქ, სადაც გავლენა დაკარგა, სადაც საბჭოთა კავშირის გავლენა იყო. ის უკან დაიბრუნებს რაც შუძლია მეტს და ჩვენ გვესმის, რის ფასად“, - აღნიშნა ვოლოდიმირ ზელენსკიმ.