ბათუმში ადმინისტრაციული წესით რვა პირი დააკავეს

დაკავებულებს წვრილმან ხულიგნობას და პოლიციელის შეურაცხყოფას ან მისი მოთხოვნისადმი დაუმორჩიელებლობას ედავებიან.

„ყველა პირი, რომელიც დაკავებული იქნა პოლიციის მიერ, არის ადმინისტრაციული სამართალდარღვევისთვის დაკავებული, 166-ე და 173-ე მუხლებით, ზოგიერთი მხოლოდ 173-ე მუხლით, პოლიციის შეურაცხყოფისა და წინააღმდეგობის გაწევისთვის“, - უთხრა ირაკლი დგებუაძემ „ტვ პირველის“ ჟურნალისტს.

ვიდეოკადრების მიხედვით, პოლიციელებმა ელენე ხოშტარია მაშინ დააკავეს, როდესაც ის აჭარის მთავრობის სახლთან 15 იანვარს დაგეგმილი გაფიცვის შესახებ პლაკატის გაკვრას შეეცადა. იმავე დროს დააკავეს „კოალიცია ცვლილებისთვის“ კიდევ ერთი წევრი - გიორგი კირთაძეც. კირთაძე მოგვიანებით გაათავისუფლეს.

„როგორც განგვიმარტეს, მეც და ალბათ, ელენე ხოშტარიასაც ვერ გადაგვიყვანდნენ იზოლატორში იმიტომ, რომ კანონმდებლობით ამის უფლება არ აქვთ, რადგან იძულებით ვართ არალეგიტიმური პარლამენტის წევრები. რა თქმა უნდა, ჩვენ ამას არ ვცნობთ, მაგრამ, როგორც ჩანს, ეს იყო ერთადერთი მიზეზი“, - განაცხადა გიორგი კირთაძემ აჭარის პოლიციის მთავარი სამმართველოდან გამოსვლის შემდეგ.

„კოალიცია ცვლილებისთვის“ წევრის, გიგა ლემონჯავას თქმით, ელენე ხოშტარიას ადგილსამყოფელის გარკვევას ხუთი საათის განმავლობაში ცდილობდნენ.

„ახლა გავიგეთ, რომ არის ქობულეთში, პოლიციის სამმართველოს ეზოში და მივდივართ, რომ წამოვიყვანოთ. მას თან არ ჰქონდა ტელეფონი, არ მისცეს დარეკვის საშუალება. ხუთი საათის განმავლობაში ვერ დავადგინეთ სად იყო ადამიანი. ადვოკატი შევიდა ყველგან, სადაც შესაძლებელი იყო, სახალხო დამცველის წარმომადგენელიც შევიდა, არავის უთხრეს ინფორმაცია. ეს იყო გატაცება“, - განაცხადა ლემონჯავამ.

ვრცელდება ინფორმაცია, რომ დაკავებულები არიან პარტია „დროას“ წევრი შუშანა მაცაბერიძე, კოალიცია „ძლიერი საქართველოს“ წევრი ლუკა ნაცვლიშვილი და  პარტია „გახარია - საქართველოსთვის“ წევრი ელიზბარ ჩხიკვაძე.

გარდა ამისა, გამოცემა „ბათუმელები“ წერს, რომ პოლიციამ მათი ოპერატორი გურამ მურვანიძეც დააკავა.

თბილისის მსგავსად, ბათუმში უწყვეტი საპროტესტო აქციები მიმდინარეობს 28 ნოემბრიდან, მას შემდეგ, რაც „ქართულმა ოცნებამ“ განაცხადა, რომ ევროკავშირში გაწევრიანების მოლაპარაკებების გახსნის საკითხს დღის წესრიგში 2028 წლის ბოლომდე არ დააყენებს.

პოლიციამ 11 იანვარს გამართულ აქციაზე 15-მდე ადამიანი დააკავა, მათგან ერთი - ონლაინგამოცემების, „ბათუმელებისა“ და „ნეტგაზეთის“ დამფუძნებლი და დირექტორი მზია ამაღლობელი სისხლის სამართლის წესითაა დაკავებული. მას პოლიციელზე თავდასხმას ედავებიან და 4-დან 7 წლამდე თავისუფლების აღკვეთა ემუქრება.