ბინტები, პირბადეები, დამცავი სათვალეები - რა ნივთების შეძენის გამო დააყადაღეს არასამთავრობოები

ჟურნალისტ სოფო ბერიძის თქმით, შესყიდვების დოკუმენტები, რომლებიც „ქრონიკამ“ ექსკლუზიურად მოიპოვა“, მტკიცებულების სახით დევს „მტრულ საქმიანობაში დახმარებისა და საბოტაჟის საქმეში“.

28 აგვისტოს, პროპაგანდისტული ტელეარხის სიუჟეტებში გასული და Facebook-ის გვერდზე გამოქვეყნებული ინფორმაციის მიხედვით, „სამართლიანმა არჩევნებმა“ შეიძინა:

• 18 ცალი რესპირატორი – 981 ლარი
• 20 ცალი დამცავი სათვალე – 294 ლარი

„საქართველოს დემოკრატიულ ინიციატივას“ შეძენილი აქვს:

• 8 ცალი ნიღაბი – 100 ლარი
• 5 ცალი დამცავი სათვალე – 74 ლარი

„სოციალური სამართლიანობის ცენტრს“ შეძენილი აქვს:

• 35 ცალი სტერილური ბინტი – 18.55 ლარი;
• 35 ცალი ეთანოლსეპტი (სადეზინფექციო ხსნარი) – 94.5 ლარი
• 35 ცალი ლეიკოპლ getwell (ე.წ. სანტავიკი) – 12.95 ლარი
• 100 ცალი ნიღაბი რესპირატორი – 224 ლარი
• 22 ცალი რესპირატორი – 254.1 ლარი
• 15 ცალი რესპირატორი – 109.5 ლარი
• 2 ცალი აეროზოლი – 22.8 ლარი
• 10 ცალი დამცავი კეპი - 149 ლარი
• 4 ცალი სათვალე – 58.4 ლარი
• 16 ცალი სათვალე – 246.4 ლარი
• 35 ცალი წიწაკის სპერეი– 875 ლარი

„სამოქალაქო საზოგადოების ფონდს“ შეძენილი აქვს:

• 50 ცალი დამცვი სათვალე – 250 ლარი
• 70 ცალი პირბადე – 510 ლარი
• 20 ცალი დამცავი სათვალე – 100 ლარი
• 8 ცალი ნიღაბი – 100 ლარი
• 5 ცალი დამცავი ჰერმეტული სათვალე – 74 ლარი
• 12 ცალი თერმული, წყალგაუმტარი ქურთუკი – 1440 ლარი
• 4 ცალი თხელი ნიღაბი – 40 ლარი
• 4 ცალი მთლიანი ნირაბი თვალებთან ამოჭრილი – 52 ლარი

„ინფორმაციის თავისუფლების განვითარების ინსტიტუტს“ შეძენილი აქვს:

• 5 ცალი დამცავი პირბადერ ნახევარი სახისთვის L – 339.4 ლარი
• 5 ცალი დამცავი პირბადერ ნახევარი სახისთვის M – 339.4 ლარი

„დემოკრატიის მცველებს“ შეძენილი აქვს:

• 101 ცალი რესპირატორი – 221 ლარი
• 17 ცალი აირწინაღი – 255 ლარი

„რუსულ პროპაგანდისტულ არხ „იმედზე“ გამოქვეყნებული სასაქონლო ზედნადებების თანახმად, „დემოკრატიის მცველებს“, აქციების დროს, ჯამში თურმე შეძენილი გვაქვს 118 ცალი რესპირატორი (პირბადე). მაგარი გადარჩენილი არიან ქოცები. კიდევ 50 ცალიც რომ დაგვემატებინა, დაღუპულები იყვნენ“, – ასე გამოეხმაურა გიორგი მშვენიერაძე, „დემოკრატიის მცველების“ გამგეობის თავმჯდომარე „იმედის“ მიერ გავრცელებულ ინფორმაციას.

არასამთავრობო ორგანიზაციის წარმომადგენლებმა არაერთხელ განაცხადეს, რომ დამცავი საშუალებები საკუთარი თანამშრომლებისთვის შეიძინეს, რომლებიც აქციებში მონაწილეობდნენ ან ადოკუმენტირებდნენ უფლებადარღვევის ფაქტებს.

„საკუთარი თანამშრომლებისთვის ოცდაათამდე აირწინაღი და სათვალე ვიყიდეთ, ვინაიდან თანამშრომლების ნაწილი აქციებში რიგით დემონსტრანტად მონაწილეობდა, ისე როგორც საქართველოს ათობით ათასი მოქალაქე, ნაწილი კი პროცესს მონიტორინგს უწევდა ჩვენი ორგანიზაციის მანდატიდან გამომდინარე და ცხადია, არავის გვინდოდა, ეს ხალხი მოწამლულიყო იმ მხუთავი გაზითა და სპეციალური საშუალებებით, რასაც პოლიცია იყენებდა.

ეგ იყო და ეგ. ცხადია, ძალადობასა თუ მასთან მიახლოებულ ქმედებაში არასოდეს ვყოფილვართ ჩართული“, - დაწერა Facebook-ზე „სამართლიანი არჩევნების“ ხელმძღვანელმა, ლევან ნატროშვილმა 27 აგვისტოს.

„სამოქალაქო საზოგადოების ფონდის ხელმძღვანელმა“, ქეთი ხუციშვილმა კი თქვა, რომ პირბადეები და ჩაფხუტები მედიასაშუალებების წარმომადგენლებს გადასცეს, რათა „მათ უსაფრთხოდ გაეშუქებინათ“ საპროტესტო გამოსვლები.

„ჩვენ ამ დამცავ საშუალებებს ვყიდულობდით, მაგალითად, ჟურნალისტებისთვის, ჩვენი თანამშრომლებისთვის. დაახლოებით სამი კვირის განმავლობაში ვადევნებით თვალს იმას, რომ ადამიანებს ქუჩაში სცემდნენ, პოლიცია იყენებდა სპეციალურ საშუალებებს კანონის აცდენილით, ქართული და საერთაშორისო ნორმების დარღვევით. პირადად მე არაერთხელ მოვიწამლე აქციაზე. ასე რომ, ბუნებრივია, ჩვენი მიზანი იყო, მაქსიმალურად დაგვეცვა ჩვენი თანამშრომლები, ჟურნალისტები. სხვებისთვისაც რომ შეგვეძინა, არანაირი დარღვევა არ არის, რადგან ეს არის კანონიერ ბრუნვაში არსებული საგნები. იქიდან გამომდინარე, რომ ჩვენი ორგანიზაცია წლების განმავლობაში მუშაობს მედიის თავისუფლების მიმართულებით, ჟურნალისტების უსაფრთხოება ძალიან მნიშვნელოვენი იყო“, - განაცხადა „სამოქალაქო საზოგადოების ფონდის“ სამართლებრივმა მრჩეველმა, გიორგი ბურჯანაძემ.

27 აგვისტოს თბილისის საქალაქო სასამართლომ დააკმაყოფილა პროკურატურის შუამდგომლობა და შვიდი არასამთავრობო ორგანიზაციის საბანკო ანგარიშები დააყადაღა. „საბოტაჟის საქმის“ გამოძიების ფარგლებში, პროკურატურა მათ 2024 წლის პერიოდში საპროტესტო აქციების „დაფინანსებას“, დაჯარიმებული პირების სასარგებლოდ ჯარიმების გადახდას და მათი დაცვის ხარჯების უზრუნველყოფას ედავება.

„[არასამთავრობო ორგანიზაციების] მიზნობრივი ფინანსები გამოყენებული იქნა ისეთი აღჭურვილობის შესაძენად, როგორიც არის – სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები, რასაც აქციის მონაწილეები აქტიურად იყენებდნენ პოლიციასთან ძალადობრივი დაპირისპირების დროს“, - აცხადებს პროკურატურა.

დაყადაღებულია შემდეგი არასამთავრობო ორგანიზაციები:

• „სამოქალაქო საზოგადოების ფონდი“
• „სამართლიანი არჩევნები“
• „ინფორმაციის თავისუფლების განვითარების ინსტიტუტი“
• „დემოკრატიის მცველები“
• „საქართველოს დემოკრატიული ინიციატივა“
• „საფარი“
• „სოციალური სამართლიანობის ცენტრი“

ორგანიზაციების წარმომადგენლები აცხადებენ, რომ ეს გადაწყვეტილება ფაქტობრივად მათ ინსტიტუციურ და ფინანსურ პარალიზებას ნიშნავს. ამის მიუხედავად, ისინი საქმიანობის გაგრძელებას აპირებენ. როგორც „სამოქალაქო საზოგადოების ფონდის“ ხელმძღვანელმა, ქეთი ხუციშვილმა განაცხადა, სასამართლოს განჩინებას გაასაჩივრებენ ჯერ ადგილობრივ დონეზე, შემდეგ კი ადამიანის უფლებათა ევროპულ სასამართლოში.

პროკურატურამ ე.წ. საბოტაჟის საქმის გამოძიება თებერვალში, „ქართულ ოცნებასთან“ აფილირებილი ორგანიზაციის „ერთიანი ნეიტრალური საქართველოს“ განცხადების საფუძველზე დაიწყო. გამოძიების ფარგლებში, მარტში დააყადაღეს „ნანუკას ფონდის“, „ფროსფერითის“, „ფონდი ერთმანეთისთვის 24/7“-ის, „სირცხვილიას“ და „თბილისის ადამიანის უფლებათა სახლის“ საბანკო ანგარიშებიც.