ამერიკის შეერთებული შტატების სახელმწიფო მდივანმა ენტონი ბლინკენმა და საფრანგეთის საგარეო საქმეთა მინისტრმა, ჟან-ნოელ ბარომ პარიზში შეხვედრისას საქართველოს შესახებაც ისაუბრეს. შეხვედრის შემდეგ გამართულ პრესკონფერენციაზე ბლინკენმა თქვა, რომ აშშ-ის, საფრანგეთის და ბევრი სხვა ქვეყნის მიზანი საქართველოსთან მიმართებაში ერთიანია.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
„ის, რასაც როგორც საფრანგეთი, ისე ამერიკის შეერთებული შტატები ვხედავთ, დემოკრატიული უკან დახევაა, რაც ღრმად შემაშფოთებელია. ეს არა მხოლოდ დემოკრატიული უკანდახევაა, არამედ არის უკან დახევა ქართველი ხალხის აბსოლუტური უმრავლესობის მისწრაფებისგან, მისწრაფებისგან ააშენო მომავალი, რომელიც უფრო და უფრო ახლოსაა ევროპასთან.
ასე რომ, დავინახეთ რა ეს უკან დახევა, მთავრობა, რომელიც მოქმედებს იმ ხალხის აშკარად გამოხატული ნების საწინააღმდეგოდ, რომლის წარმომადგენლობის პრეტენზიაც აქვს, ვიხილეთ რა არჩევნები, რომელმაც მრავალი კითხვა გააჩინა, ხელისუფლების რეპრესიული ქმედებები ადამიანების მიმართ, რომლებიც ცდილობენ თავისუფლად და ღიად ისაუბრონ, ჩვენ და ჩვენმა პარტნიორებმა ზომები მივიღეთ“, - განაცხადა აშშ-ის სახელმწიფო მდივანმა.
ენტონი ბლინკენის თქმით, აშშ-მა დაასანქცირა პარტია „ქართული ოცნების“ ლიდერი ბიძინა ივანიშვილი და საქართველოს მთავრობის წარმომადგენლები, ასევე, საქართველოს მთავრობას ამერიკული დახმარება შეუჩერა.
„ეუთოში თითქმის ყველა ჩვენს პარტნიორთან, მათ შორის საფრანგეთთან ერთად, ეუთოს მეშვეობით ავამოქმედეთ ვენის მექანიზმი, რათა ნათლად განვმარტოთ, რომ გადადგმული ნაბიჯები, მათ შორის კანონმდებლობა, რომელიც არსებითად ზღუდავს სივრცეს გამოხატვის და სამოქალაქო საზოგადოების მოქმედების თავისუფლებისთვის, უნდა შეიცვალოს.
ასე რომ, ვფიქრობ, თქვენ ხედავთ მიზნის მკაფიო ერთიანობას, როდესაც საქმე ეხება შეერთებულ შტატებს, საფრანგეთს, ბევრ სხვა ქვეყანას, რომლებიც საქართველოს ხელისუფლების ძალიან სამწუხარო ქმედებების წინაშე აღმოვჩნდით“, - განაცხადა ბლინკენმა.
27 დეკემბერს, ამერიკის შეერთებულმა შტატებმა „ქართული ოცნების“ დამფუძნებელსა და საპატიო თავმჯდომარეს, ბიძინა ივანიშვილს ფინანსური სანქციები დაუწესა „რუსეთის ფედერაციის სასარგებლოდ საქართველოს დემოკრატიული და ევროატლანტიკური მომავალთვის ძირის გამოთხრის გამო“. სახაზინო დეპარტამენტის უცხოური აქტივების კონტროლის ოფისმა (OFAC) ივანიშვილი სპეციალურად დასანქცირებული მოქალაქეების და ბლოკირებული პირების სიაში (SDN List) დაამატა.
ივანიშვილის გარდა აშშ-ს დასანქცირებული ჰყავს საქართველოს შინაგან საქმეთა მინისტრი ვახტანგ გომელაური, ასევე, შს სამინისტროს განსაკუთრებულ დავალებათა დეპარტამენტის დირექტორი ზვიად ხარაზიშვილი [„ხარება“] და მისი მოადგილეები - მირზა კეზევაძე და მილერი ლაგაზაური.
