გერმანიის ბუნდესტაგის ოთხი საპარლამენტო ჯგუფის საგარეო საქმეთა სპიკერები ერთობლივი განცხადებით გმობენ პარტია „ქართული ოცნების“ გადაწყვეტილებას, „შეწყვიტოს ძალისხმევა ევროკავშირში გაწევრიანების მოლაპარაკებების დასაწყებად, საკუთარი საარჩევნო კამპანიის დაპირებების საწინააღმდეგოდ“.
ახალი ამბები
მკითხველის რჩეული
- 1 ირლანდიიდან საქართველოს 32 მოქალაქის დეპორტაცია განხორციელდა
- 2 კობახიძე მაღაროელების პროტესტზე: რთულია კერძო ბიზნესს ხელფასების გადახდა მოსთხოვო
- 3 პროკურორი ბაჩიაშვილის ქვეყნიდან წასვლაზე: „აუცილებლად დაიწყება გამოძიება“
- 4 რატომ შეხვდა აშშ-ის ელჩი „ქართული ოცნების“ საგარეო საქმეთა მინისტრს
- 5 მაკრონმა უკრაინაში ცეცხლის ნაწილობრივ შეწყვეტის ერთთვიან გეგმაზე ისაუბრა
- 6 კობახიძე: აქედანვე შემიძლია გითხრათ, რომ თვითმმართველობის არჩევნებს მოვიგებთ
„ეს წარმოადგენს გადახვევას საქართველოს ყველა წინა მთავრობის პოლიტიკიდან და ევროკავშირში ინტეგრაციისკენ ქართველი ხალხის აბსოლუტური უმრავლესობის მისწრაფებებიდან“, - ვკითხულობთ განცხადებაში.
როგორც გერმანელი პარლამენტარები აღნიშნავენ, 2023 წლის დეკემბერში საქართველოს „ქართველების მიერ დიდი ხნის ნანატრი“ ევროკავშირის წევრობის კანდიდატი ქვეყნის სტატუსი მიენიჭა, თუმცა, იმის ნაცვლად, რომ „ქართულ ოცნებას“ ეს ისტორიული შესაძლებლობა გამოეყენებინა, მან „აირჩია მზარდი ავტორიტარული და ანტიევროპული კურსი“.
განცხადებაში ნათქვამია, რომ 26 ოქტომბრის საპარლამენტო არჩევნებზე დამოუკიდებელი დამკვირვებლების მხრიდან იყო არაერთი მინიშნება სერიოზულ საარჩევნო ჩარევასა და მანიპულაციაზე.
„საქართველოში საპროტესტო აქციები უკვე კრიტიკულ წერტილამდეა. პოლიციამ მომიტინგეების დასაშლელად ცრემლსადენი გაზი, წყლის ჭავლი და რეზინის ტყვიები გამოიყენა. რამდენიმე ასეული ადამიანი დააკავეს, მათი უმეტესობა უსაფრთხოების ძალების მხრიდან ძალადობისა და არაადამიანური მოპყრობის შესახებ საუბრობს. არსებობს ძალაუფლების მქონე პირების მხრიდან რეპრესიების გაზრდის საფრთხე“, - ბუნდესტაგის წევრები გმობენ ძალადობას საპროტესტო აქციების მონაწილეებზე და მიიჩნევენ, რომ ძალადობის ყველა აქტი გამოძიებული უნდა იყოს.
„ფედერალური მთავრობა სამართლიანად უჭერს მხარს ევროკავშირის დონეზე მიზნობრივ სანქციებს იმ პირების წინააღმდეგ, ვინც პასუხისმგებლები არიან მშვიდობიანი დემონსტრანტების წინააღმდეგ ადამიანის უფლებების სერიოზულ დარღვევაზე.
9 ძირითად პასუხისმგებელ პირზე უკვე დაწესებულია ეროვნული აკრძალვა [გერმანიაში] შემოსვლაზე. ჩვენ მივესალმებით იმ ფაქტს, რომ ორმხრივი თანამშრომლობა გადაიხედა და რომ მხარდაჭერის მრავალი ღონისძიება უკვე შეჩერდა ან აღარ დამტკიცდა“, - ნათქვამია განცხადებაში.
ბუნდესტაგის წევრები ადასტურებენ ქართველი ხალხის ევროპული მისწრაფებებისადმი მხარდაჭერას და აღნიშნავენ, რომ გააგრძელებენ სამოქალაქო საზოგადოების დახმარებას „დემოკრატიულ და ევროპულ გზაზე ქვეყნის დაბრუნებაში“.
„ახლა საჭიროა პლურალისტური პროცესი დემოკრატიული პრინციპების აღდგენისა და კონსოლიდაციის მიზნით, რის შედეგადად შეიძლება შედგეს თავისუფალი და სამართლიანი საპარლამენტო არჩევნები“, - წერია განცხადებაში, რომელსაც ხელს აწერენ „სოციალ-დემოკრატიული პარტიის“ (SPD), „ქრისტიან-დემოკრატიული კავშირის“ (CDU) და „ქრისტიან-სოციალური კავშირის“ (CSU) გაერთიანების, „თავისუფალი დემოკრატიული პარტიის“ (FDP) და „ალიანსი 90/მწვანეების“ ჯგუფების საგარეო პოლიტიკის სპიკერები. მე-20 მოწვევის ბუნდესტაგში აღნიშნულ ჯგუფებს უმრავლესობა (733 მანდატიდან 610) აქვთ.
