ორი ოპოზიციური კოალიციის მიმართვის შემდეგ, ცენტრალური საარჩევნო კომისია განმარტავს, რომ პარტიულ სიებს ვერ გააუქმებს.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 ოკუპირებულ გალში, რუსეთის სამხედრო ბაზაზე, დავით ქაცარავას დრონი ჩამოაგდეს
- 3 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 4 26 ოქტომბრის არჩევნების გამო დე ფაქტო აფხაზეთი ენგურის ხიდს ჩაკეტავს
- 5 „ქართული ოცნება“ ამომრჩევლებისთვის პირადობის მოწმობების ჩამორთმევას უარყოფს
- 6 ბუდანოვის თქმით, უკრაინაში საომრად 11 ათასი ჩრდილოკორეელი ჯარისკაცი ემზადება
„მოქმედი კანონმდებლობა ახალარჩეული დეპუტატების უფლებამოსილების ცნობამდე პარტიულ სიებში არსებულ კანდიდატთა რეგისტრაციის გაუქმებას არ ითვალისწინებს. არ ითვალისწინებს როგორც პარტიების მომართვის შემთხვევაში, ასევე პირადი განცხადებების შემთხვევაში და სხვაგვარი რეგულირება საარჩევნო კოდექსით გათვალისწინებული არ არის“, - განაცხადა ცესკოს იურიდიული დეპარტამენტის უფროსმა, გიორგი სანტურიანმა.
საპარლამენტო არჩევნებში ბარიერგადალახული ოთხი ოპოზიციური პარტიიდან ორი ცესკოს სიების გაუქმების მოთხოვნით მიმართავს. „კოალიცია ცვლილებისთვის“ და „ერთიანობა - ნაციონალური მოძრაობის“ ლიდერების, ნიკა გვარამიას და თინა ბოკუჩავას განცხადებით, სიის ყველა წევრი უარს ამბობს, გაყალბებული არჩევნების შედეგად შემდგარი პარლამენტის მანდატებზე.
„ჩვენი თავისუფალი ნების გამოხატვაა წერილები, რომელსაც ვგზავნით ცესკოში და ვითხოვთ, რომ არცერთ ჩვენგანზე, არცერთ პირზე, რომელიც ფიგურირებდა „ერთიანობა - ნაციონალური მოძრაობის“ საარჩევნო სიაში, არ მოხდეს დროებითი მანდატის გაცემა, არ გაგვატარონ რეგისტრაციაში და შესაბმისად, პარლამენტს არ გადაეგზავნოს ჩვენი სახელები და გვარები ჩვენი უფლებამოსილების ცნობის მიზნით“, - თქვა ბოკუჩავამ.
ნიკა გვარამიას მტკიცებით, მათი მოთხოვნა „სამართლებრივად სრულიად გამართულია“, თუმცა, მან არ გამორიცხა, რომ „ცესკომ და პარლამენტმა შეიძლება დაიწყონ უკანონო გადაწყვეტილებების მიღება“.
„რამდენჯერაც იქნება საჭირო, ამ სიის 82-ვე წევრი მოაწერს ხელს უარს. ამით ვადასტურებთ, რომ პარლამენტი არის არალეგიტიმური და ჩვენი მონაწილეობა ამ პარლამენტში გამორიცხულია. ჩვენ ვერ შევძენთ მას ლეგიტიმაციას ჩვენი იქ ყოფნით“, - აღნიშნა გვარამიამ.
მანდატებზე უარის თქმას და სიების ჩახსნას აპირებენ დანარჩენი ბარიერგადალახული პარტიებიც, თუმცა მათ ცესკოსთვის არ მიუმართავთ. პარტიაში „გახარია საქართველოსთვის“ განაცხადეს, რომ თინა ბოკუჩავასა და ნიკა გვარამიას ინიციატივა „პოპულისტურია“.
„მსგავსი ქმედების საფუძველი კანონში არ არსებობს. ჩვენ ჩვენს გეგმას მივყვებით, ნათქვამი გვაქვს და დღესაც ვამბობთ, რომ ამ პარლამენტს ლეგიტიმაციას არ მივცემთ“, - განაცხადა ბექა ლილუაშვილმა, პარტიის „გახარია საქართველოსთვის“ ერთ-ერთმა ლიდერმა.
