დიდმა ბრიტანეთმა დაასანქცირა „რუსნეფტი“, რომელიც ნავთობს საქართველოში ყიდდა

სანქციები ითვალისწინებს შავ სიაში შეყვანილი ფიზიკური და იურიდიული პირების ყველა აქტივის გაყინვას დიდ ბრიტანეთში.

აღსანიშნავია, რომ კომპანია „რუსნეფტმა“ 2025 წლის ოქტომბერში ყულევში ახალაშენებულ ნავთობგადამამუშავებელ ქარხანას ნავთობის პირველი პარტია მიაწოდა. ეს ინფორმაცია თავდაპირველად სააგენტო Reuters-მა გაავრცელა. გამოცემა წერდა, რომ „კაისერიმ“ 105 340 ტონა ციმბირის მსუბუქი კლასის ნავთობი რუსეთის ნოვოროსიისკის პორტიდან ყულევის ნავთობტერმინალში 6 ოქტომბერს მიიტანა.

საქართველოს ფინანსთა სამინისტროს შემოსავლების სამსახურის განცხადებით, პანამის დროშის ქვეშ მცურავი გემი „კაისერი“ (KAYSERI) რუსეთიდან ყულევის პორტში 2 ოქტომბერს შევიდა და მას 10 000 ტონამდე ნედლი ნავთობი გადაჰქონდა. უწყებამ რუსული კომპანიის სახელწოდება არ გაამხილა.

ამასთან, შემოსავლების სამსახურმა განმარტა, რომ გემსა და გემის მფლობელ კომპანიაზე, ასევე ტვირთის გამომგზავნ და მიმღებ კომპანიებზე საერთაშორისო სანქციები არ ვრცელდებოდა.

ხობის მუნიციპალიტეტში, ყულევის ნავთობგადამამუშავებელ ქარხანას შპს „ბლექ სი პეტროლიუმი“ აშენებს. კომპანიის დამფუძნებელი ბიზნესმენი მაკა ასათიანია, პროექტის საინვესტიციო მოცულობა კი 700 მილიონ აშშ დოლარს შეადგენს.

ერთი წლის წინ, 2024 წლის ოქტომბერში გამართულ პრეზენტაციაზე „ქართული ოცნების“ პრემიერ-მინისტრმა, ირაკლი კობახიძემ განაცხადა, რომ ეს არის ყველაზე მსხვილი კერძო საინვესტიციო პროექტი დამოუკიდებელი საქართველოს ისტორიაში. 2025 წლის სექტემბერში „ბლექ სი პეტროლიუმის“ სამეთვალყურეო საბჭოს თავმჯდომარედ  ეკონომიკის ყოფილი მინისტრი ლევან დავითაშვილი დაინიშნა.