„ძლიერი საქართველოს“ წევრები ვეფხია კასრაძე და ვასილ კაძელაშვილი დააკავეს

ბუაძის თქმით, კასრაძე და კაძელაშვილი დაკავებულები არიან ტელეკომპანია „იმედზე“ ახლახან გასული „ბოდვის გამო“.

ვასილ კაძელაშვილის დაკავების კადრები ტელეკომპანია „იმედმა“, „რუსთავი 2“-მა და Pos TV-მ გადაიღეს. „ზღაპარია, ზღაპარი ყველაფერი“, - თქვა დაკავებულმა ვიდრე პოლიციის მანქანაში ჩასვამდნენ.

სამთავრო პროპაგანდისტულმა ტელევიზიებმა 2 დეკემბერს გამოაქვეყნეს სავარაუდოდ აქციაზე გადაღებული ფარული ჩანაწერი, სადაც მათი მტკიცებით, ვეფხია კასრაძე და ვასილ კაძელაშვილი „ქართული ოცნების“ წევრების ქონების დაზიანებასა და დივერსიის მოწყობაზე საუბრობენ.

შინაგან საქმეთა სამინისტროს ვეფხია კასრაძისა და ვასილ კაძელაშვილის დაკავებასთან დაკავშირებით ინფორმაცია არ გაუვრცელებია.

ცენტრალური კრიმინალური პოლიციის დეპარტამენტის თანამშრომლები საპროტესტო აქციებში ჩართული ოპოზიციური პარტიების ოფისებსა და აქტივისტების საცხოვრებელ ბინებს ჩხრეკენ.

ჩხრეკა ჩატარდა „კოალიცია ცვლილებისთვის“ და „ერთიანობა - ნაციონალური მოძრაობის“ ოფისებში, რა დროსაც პარტია „ახალის“ თანათავმჯდომარე ნიკა გვარამია და „გირჩი - მეტი თავისუფლების“ წევრი გელა ხასაია დააკავეს.

პოლიციამ გადაუდებელი აუცილებლობით, სასამართლოს განჩინების გარეშე, გაჩხრიკა ჯგუფ „დაიტოვეს“ დამფუძნებლის, ილია ღლონტის საცხოვრებელი ბინაც. როგორც პოლიციელებმა განმარტეს, საქმე სისხლის სამართლის კოდექსის 225-ე და 2391-ე მუხლებით არის აღძრული, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას და ძალადობრივი ქმედებისაკენ საჯაროდ მოწოდებას გულისხმობს.

გუშინ 3 დეკემბერს, კრიმინალურმა პოლიციამ აქტივისტ დოდი ხარხელის პირადი ჩხრეკა ჩაატარა. მას ქუჩაში, შვილის საბავშვო ბაღში დატოვების შემდეგ დახვდნენ. პარალელურად ჩხრეკა მიმდინარეობდა აქტივისტის საცხოვრებელ ბინაში. ამ შემთხვევაში შსს-მ ჩხრეკის საბაბად რამდენიმე თვის წინ, დოდი ხარხელის ყოფილი მეუღლის უჩა აბაშიძის საქმეზე დაწყებული გამოძიება დაასახელა.

პოლიტიკოსები და აქტივისტები ჩხრეკებსა და დაკავებებს დაშინების მცდელობად აფასებენ.