ევროკავშირის წევრი ქვეყნების საგარეო საქმეთა მინისტრები 15 ივლისს, სამშაბათს, საგარეო საქმეთა საბჭოს ფორმატში შეხვედრას გამართავენ და სხვა საკითხებთან ერთად, საქართველოში არსებულ ვითარებასაც განიხილავენ.
ახალი ამბები
მკითხველის რჩეული
- 1 „რეპრესიები რეორგანიზაციის სახელით“ - თელავის უნივერსიტეტიდან 5 პროფესორი გაათავისუფლეს
- 2 რიჟვაძის საქმეზე საზღვაო ტრანსპორტის სააგენტოს დირექტორი ალექსი ახვლედიანი დააკავეს
- 3 პაპუაშვილი არჩევნებზე წალენჯიხის მერიის განცხადებას „საბოტაჟს“ უწოდებს
- 4 თავდაცვის ყოფილი მინისტრის მოადგილე და ნათესავი დააკავეს 1.3 მლნ-ის გაფლანგვის ბრალდებით
- 5 ნათესავებმა თბილისში იპოვეს ჩეჩნეთიდან ოჯახში ძალადობას გამოქცეული ქალი და მისი წაყვანა სცადეს
- 6 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
„საბჭო იმსჯელებს საქართველოში არსებულ ვითარებაზე და განიხილავს შესაძლო ზომებს ხელისუფლების მზარდი რეპრესიების საპასუხოდ“, - ვკითხულობთ ევროპული საბჭოს ვებგვერდზე, სადაც დღის წესრიგის მნიშვნელოვანი საკითხებია ჩამოთვლილი.
საგარეო საქმეთა საბჭო ევროკავშირის ყველა წევრი სახელმწიფოს საგარეო საქმეთა მინისტრისგან შედგება და პასუხისმგებელია ევროკავშირის საგარეო ქმედებებზე. საბჭოს სხდომებს საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, კაია კალასი ხელმძღვანელობს.
9 ივლისს, ევროპარლამენტმა საქართველოს შესახებ მორიგი კრიტიკული რეზოლუცია მიიღო. მასში ხაზგასმულია ევროპარლამენტის პოზიცია, რომ საქართველოში არსებული კრიზისის დასაძლევად, საჭიროა ახალი საპარლამენტო არჩევნების ჩატარება და რომ ევროკავშირმა და მისმა წევრმა სახელმწიფოებმა სასწრაფოდ უნდა გადააფასონ ურთიერთობა „ქართული ოცნების“ რეჟიმთან, მიიღონ კონკრეტული ზომები სამოქალაქო საზოგადოებისა და მედიის მხარდასაჭერად. ევროპარლამენტი მკაცრად გმობს ძალადობრივ რეპრესიებს, თვითნებურ და პოლიტიკურად მოტივირებულ დაკავებებს, ასევე, პროევროპულ საპროტესტო აქციების მხარდაჭერის გამო, საჯარო მოხელეების სამსახურიდან გათავისუფლებას.
რეზოლუციით ევროპარლამენტი ევროკომისიას და ევროპულ საბჭოს მოუწოდებს, „ქართული ოცნების“ ქმედებების გამო, გადახედონ საქართველოს უვიზო მიმოსვლის სტატუსს, მისი შეჩერების შესაძლებლობით.
ევროპარლამენტი ევროკავშირის წევრ სახელმწიფოებს ასევე მოუწოდებს, განიხილონ დამატებითი შემზღუდავი ზომები, როგორიცაა საქართველოს SWIFT-დან გათიშვა ან სექტორული სანქციები, რომელთა მიზანი „ქართული ოცნების“ რეჟიმის ფინანსური ნაკადებისა და შემოსავლის წყაროების შეწყევეტა იქნება.
რეზოლუციაში ნახსენებია 4 ოქტომბერს დაგეგმილი ადგილობრივი თვითმმართველობის არჩევნებიც. ევროპარლამენტი მიიჩნევს, რომ ქვეყანაში არსებული პოლიტიკური და სამართლებრივი პირობების გათვალისწინებით, ეს არჩევნები არ წარმოადგენს ქართველი ხალხის დემოკრატიული არჩევანის გამოხატვის რეალურ შესაძლებლობას და მასში მონაწილეობა თვითგამოცხადებული ხელისუფლების მიერ ახალი სტატუს კვოს აღიარებად იქნება გამოყენებული.
