ევროპარლამენტი აცხადებს, რომ არ აღიარებს „ქართული ოცნების“ ხელისუფლებას, ქვეყნის ევროპული გზა კი შეჩერებულია მანამ, სანამ სამართლიანი არჩევნები არ ჩატარდება.
ახალი ამბები
მკითხველის რჩეული
- 1 ნარკოტიკების ზედოზირებას თბილისში კიდევ 3 ახალგაზრდა ემსხვერპლა
- 2 გორში პოლიციელების მიერ ნაცემი პირი წინააღმდეგობის გაწევის ბრალდებით დააკავეს
- 3 გიგა ავალიანის საქმე: დემეტრე ჩიქოვანს 9 წელი და 9 თვე, ანი ნასყიდაშვილს 5 წელი და 3 თვე მიესაჯა
- 4 პანკისში მალხაზ მაჩალიკაშვილის ავტომობილი დააზიანეს
- 5 პროკურატურამ გორში ნაცემი პაპუნა ლოცულაშვილისთვის ბრალის წარდგენაზე უარი თქვა
- 6 6 პოლიციელი დააკავეს გორში მოქალაქეებზე ძალადობის ბრალდებით
„საქართველო ვერ გახდება ევროკავშირის წევრი მანამ, სანამ მისი მთავრობა ავტორიტარულ კურსს ვერ შეცვლის. ევროპარლამენტი დგას ქართველი ხალხის გვერდით, არ აღიარებს საქართველოს მოქმედ ხელისუფლებას და აცხადებს, რომ ქვეყნის ევროპული გზა შეჩერებულია, სანამ არ ჩატარდება სამართლიანი არჩევნები“, - ვკითხულობთ ევროპარლამენტის მიერ სოციალურ ქსელ X-ზე გამოქვეყნებულ განცხადებაში.
ათი დღის წინ, ევროპარლამენტმა მიიღო რეზოლუცია, სადაც ნათქვამია, რომ 2024 წლის ოქტომბრის გაყალბებული საპარლამენტო არჩევნები ავტორიტარული რეჟიმისკენ აშკარა გარდამტეხ მომენტს წარმოადგენდა. ევროპარლამენტი მიიჩნევს, რომ ამ ხარვეზიანმა არჩევნებმა გზა გაუხსნა მმართველ პარტია „ქართულ ოცნებას“ უკანონოდ მიეტაცებინა სახელმწიფო ინსტიტუტები, გაეგრძელებინა რეპრესიული კანონმდებლობის მიღება და ამავდროულად, ჩაეხშო პოლიტიკური ოპონენტები, ჟურნალისტები და მშვიდობიანი მომიტინგეები.
რეზოლუციაში ხაზგასმულია, რომ მოახლოებული ადგილობრივი თვითმმართველობის არჩევნები არ წარმოადგენს შესაძლებლობას, ასახოს ქართველი ხალხის დემოკრატიული არჩევანი, თუ დაპატიმრებული და დაკავებული პოლიტიკური ოპოზიციის ლიდერები არ გათავისუფლდებიან და არჩევნები გაუმჯობესებულ საარჩევნო გარემოში არ ჩატარდება.
ევროპარლამენტარები ასევე გამოხატავენ ღრმა შეშფოთებას საქართველოში არსებული შემზღუდავი მედია გარემოსა და ოპოზიციაზე თავდასხმების გამო, მათ შორის „ქართული ოცნების“ ლიდერების იმ განცხადებებთან დაკავშირებით, რომლებიც ოპოზიციური პარტიების არაკონსტიტუციურად გამოცხადების განზრახვაზე მიუთითებენ.
9 ივლისის რეზოლუციაში ჩაიწერა, რომ ევროპარლამენტი არ ცნობს საქართველოს ამჟამინდელი ერთპარტიული პარლამენტისა და პრეზიდენტის ლეგიტიმურობა, მოუწოდებს „ქართული ოცნების“ ხელისუფლებას ახალი საპარლამენტო არჩევნების ჩატარებისკენ.
