გაქცეული მოლდოველი ოლიგარქი ვლადიმირ პლახოტნიუკი საბერძნეთში დააკავეს

„ინტერპოლიდან ოფიციალური არხებით მივიღეთ შეტყობინება საბერძნეთში მოლდოვის ორი მოქალაქის დაკავების შესახებ. ერთ-ერთი მათგანი ვლადიმირ პლახოტნიუკია“, - ნათქვამია პოლიციის განცხადებაში.

პოლიციის გენერალური ინსპექციის უფროსმა, ვიორელ ჩერნაუტანუმ თქვა, რომ მოლდოვის დაკავებული მოქალაქეები დუბაიში მიემგზავრებოდნენ.

აშშ-ისა და ევროკავშირის მიერ დასანქცირებული ვლადიმირ პლახოტნიუკი ხელმძღვანელობდა „მოლდოვის დემოკრატიულ პარტიას“, რომელიც ხელისუფლებაში 2016 წლიდან 2019 წლამდე იყო. გარდა ამისა, პლახოტნიუკი მოლდოვის ორი მოწვევის პარლამენტის ყოფილი წევრია და ქვეყნის ერთ-ერთ უმდიდრეს ადამიანად მიიჩნევა.

მოლდოვაში პლახოტნიუკის წინააღმდეგ სამი სისხლის სამართლის საქმეა აღძრული. მას ბრალად ორგანიზებული დანაშაულებრივი ჯგუფის შექმნა, გამოძალვა და თაღლითობა ედება. პროკურატურის მტკიცებით, პლახოტნიუკმა 2012-2014 წლებში ქვეყნის უმსხვილესი ბანკების ანგარიშებიდან 1 მილიარდ დოლარზე მეტი მოიპარა.

ვლადიმირ პლახოტნიუკი მოლდოვიდან 2019 წლის ზაფხულში, მისი პარტიის ოპოზიციაში გადასვლის შემდეგ გაიქცა. 2025 წლის თებერვალში ინტერპოლმა მასზე საერთაშორისო ძებნა გამოაცხადა.

პლახოტნიუკი მძიმე დანაშაულებშია ბრალდებული რუსეთშიც და დაუსწრებლად აქვს პატიმრობა შეფარდებული მკვლელობის მცდელობის, განსაკუთრებით დიდი მასშტაბით კონტრაბანდისა და ნარკოტიკებით ვაჭრობის საქმეებზე. ვლადიმირ პლახატნიუკი, მოლდოველ პოლიტიკოს რენატო უსატისთან ერთად, ასევე ეჭვმიტანილია რუსული ბანკებიდან დიდი ოდენობით თანხების გატანაში.