საქართველოს არალეგიტიმური პრემიერ-მინისტრი ირაკლი კობახიძე ჩინეთის სახალხო რესპუბლიკის ელჩს საქართველოში, ჭოუ ციენს შეხვდა.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
მთავრობის ადმინისტრაციის ინფორმაციით, საუბარი შეეხო საქართველოსა და ჩინეთის სტრატეგიული პარტნიორობის შეთანხმებით გათვალისწინებულ სფეროებში თანამშრომლობას და სავაჭრო-ეკონომიკური კავშირების განვითარების პოზიტიურ დინამიკას.
„აღინიშნა, რომ თავისუფალი ვაჭრობის შეთანხმება და უვიზო მიმოსვლა, ასევე ხალხთაშორისი კავშირები კარგ შესაძლებლობას წარმოადგენს ორმხრივი ურთიერთობების კიდევ უფრო განვითარებისთვის. მხარეებმა დაადასტურეს მზადყოფნა შედეგზე ორიენტირებული თანამშრომლობის შემდგომი გაძლიერებისთვის“, - ნათქვამია გავრცელებულ განცხადებაში.
ირაკლი კობახიძე ჭოუ ციენს დაახლოებით ერთი თვის წინ, 6 დეკემბერსაც შეხვდა. მაშინ, ჩინელმა დიპლომატმა მას საპარლამენტო არჩევნებში „ქართული ოცნების“ გამარჯვება და მთავრობის ახალი შემადგენლობის დამტკიცება კიდევ ერთხელ მიულოცა.
26 ოქტომბრის საპარლამენტო არჩევნების შემდეგ კობახიძეს მთავრობის ადმინისტრაციაში, ჩინეთის გარდა, არცერთი სხვა ქვეყნის ელჩი არ მიუღია.
ამასთან, 17 დეკემბერს ჭოუ ციენი შეხვდა მაკა ბოჭორიშვილს, რომელსაც „ქართული ოცნების“ მთავრობაში საგარეო საქმეთა მინისტრის თანამდებობა უკავია, ხოლო 20 დეკემბერს, შინაგან საქმეთა სამინისტროში მან შეხვედრა გამართა დიდი ბრიტანეთისა და აშშ-ის მიერ დასანქცირებულ ვახტანგ გომელაურთან. 4 დეკემბერს ჩინეთის ელჩი ანტიკორუფციული ბიუროს უფროსს, რაჟდენ კუპრაშვილს შეხვდა.
