ქართველ დიპლომატებს და საჯარო მოხელეებს შვეიცარიაში შესასვლელად ვიზა დასჭირდებათ

გასულ თვეში ევროკავშირმა პირველად საქართველოს მიმართ აამოქმედა ვიზების შეჩერების ახალი, გაძლიერებული მექანიზმი და დემოკრატიისა და ფუნდამენტური უფლებების ძირითად სფეროებში აღებული ვალდებულებების „განზრახ და მუდმივი დარღვევის“ საპასუხოდ, დიპლომატიური პასპორტების მქონე საქართველოს მოქალაქეებისთვის უვიზო მიმოსვლა ერთი წლით შეაჩერა.  

ევროკომისიამ განმარტა, რომ 2024 წლის ოქტომბრიდან მოყოლებული საქართველოს ხელისუფლების ქმედებებმა, მათ შორის მომიტინგეების, ოპოზიციონერი პოლიტიკოსებისა და დამოუკიდებელი მედიის მიმართ რეპრესიებმა, ფუნდამენტური უფლებისა და საერთაშორისო სამართლებრივი სტანდარტების დარღვევა გამოიწვია. კომისია მიიჩნევს, რომ საქართველოს ხელისუფლების ქმედებები ძირს უთხრის იმ პრინციპებს, რომლებზეც დაფუძნებულია ვიზების ლიბერალიზაცია“.

მიუხედავად იმისა, რომ შვეიცარია ევროკავშირის წევრი არ არის, ის შენგენის ზონის ნაწილია და იურიდიულად ვალდებულია, შენგენის კანონმდებლობაში ცვლილებები გაითვალისწინოს. უვიზო რეჟიმის შეჩერება საქართველოს სხვა მოქალაქეებზე არ ვრცელდება.

დიპლომატიური, სამსახურებრივი და ოფიციალური პასპორტები კონკრეტული თანამდებობის პირებსა და სახელმწიფო მოსამსახურეებზე მათი სამსახურებრივი უფლებამოსილების განხორციელების მიზნით გაიცემა. ამ ტიპის პასპორტებს ფლობენ, მათ შორის, უმაღლესი თანამდებობის პირები - პრეზიდენტი, პრემიერ-მინისტრი და პარლამენტის თავმჯდომარე (ასევე მათი მეუღლეები), პარლამენტის წევრები, მინისტრები და მათი მოადგილეები, საკონსტიტუციო და უზენაესი სასამართლოების თავმჯდომარეები და წევრები, დიპლომატიური რანგის მქონე პირები და ა.შ.