მაღალმთიან აჭარაში სტიქიის შედეგად ორი ადამიანი დაიღუპა

ხულოს სოფელ თხილვანაში ზვავმა ბოლქვაძეების საცხოვრებელი სახლი წაიღო. შემთხვევის დროს სახლში ცოლ-ქმარი იმყოფებოდა. მევლუდ ბოლქვაძე გადარჩა, ხოლო 63 წლის ფატი ბოლქვაძე დაიღუპა. ამ დროისთვის სოფელი გარესამყაროს არის მოწყვეტილი.

ქედის სოფელ წონიარისში სტიქიის შედეგად 55 წლის თემურ ბარამიძე დაიღუპა. ის აჭარის პოლიციის დეპარტამენტის ქედის რაიონული სამმართველოს უბნის უმცროსი ინსპექტორი იყო. მეწყერის ჩამოწოლის დროს თემურ ბარამიძე საცხოვრებელ სახლში მარტო იმყოფებოდა.

„საშინელი უამინდობაა. ცენტრალური გზები ჩაკეტილია, რადგან ყოველ 100 მეტრში მეწყერია ჩამოსული. ზოგიერთ სოფელთან დაკავშირება შემოვლითი გზებით არის შესაძლებელი. ვერ მოძრაობენ სასწრაფო-სამედიცინო დახმარების მანქანები“, - უთხრა „საქართველოს ამბებს“ ქედის მუნიციპალიტეტის მერის მოადგილემ, მამუკა ფარტენაძემ.

გარემოს ეროვნული სააგენტოს ინფორმაციით, 8 თებერვლამდე საქართველოში მოსალოდნელია ნალექი, უმეტესად, თოვლი, ზოგან ძლიერი (ძირითადად, ქვეყნის დასავლეთ ნაწილში), მთიან რეგიონებში ნისლი, ქარბუქი, გზებზე ლიპყინული, ზვავსაშიშროება, ელექტროგადამცემ სადენებზე შემოყინულობა, ზღვაზე შესაძლებელია ძლიერი, 6 ბალამდე შტორმი.

რთული მეტეოროლოგიური პირობების, მათ შორის, დიდთოვლობის, ქარბუქისა და ზვავსაშიშროების გამო საავტომობილო გზებზე შეზღუდვებია დაწესებული.