მოსამართლემ ტროტუარზე პროტესტის ერთ-ერთ საქმეზე სამართალწარმოება შეწყვიტა

გიორგი წულაიას საქმეზე პროცესი 29 დეკემბერს იყო ჩანიშნული, თუმცა, მაშინ გაურკვეველი ვადით გადაიდო.

„8 იანვარს დამიკავშირდა მოსამართლის თანაშემწე, რომელმაც მითხრა, რომ მოსამართლე დავით მაკარიძემ ზეპირად იმსჯელა საქმეზე და გადაწყვიტა, რომ შეეწყვიტა საქმის წარმოება ჩემს წინააღმდეგ“, – განაცხადა წულაიამ. მისთვის ამ გადაწყვეტილების დასაბუთება უცნობია.

„იმდენად აბსურდული, არაკონსტიტუციური და ანტიდემოკრატიული კანონია, ისე ეწინააღმდეგება ის გამოხატვისა და სიტყვის თავისუფლებას, რომ პოლიტიკურად ანგაჟირებულ უსამართლო სასამართლოსაც უჭირს ადამიანების რამდენიმე დღით ციხეში გაშვება“, – აღნიშნა გიორგი წულაიამ.

შინაგან საქმეთა სამინისტრომ ტროტუარზე პროტესტის გამო ადმინისტრაციულ სამართალდარღვევათა ოქმი 10-ზე მეტ ადამიანს შეუდგინა, თუმცა სასამართლოს სამართალდამრღვევად ჯერ არავინ უცვნია. დღეს, 9 იანვარს, თბილისის საქალაქო სასამართლოში ანი ახმეტელის საქმეზე კიდევ ერთი სხდომა გაიმართა. მოსამართლე ზვიად ცეკვავამ პროცესის 13 იანვარს გაგრძელების გადაწყვეტილება მიიღო.

„ქართული ოცნების“ პარლამენტმა 10 დეკემბერს, პროტესტის შემზღუდავი მორიგი საკანონმდებლო ცვლილებები დაამტკიცა. შედეგად აიკრძალა ხალხის სავალი ნაწილის ხელოვნურად გადაკეტვა და სავალდებულო გახდა შინაგან საქმეთა სამინისტროს წინასწარი გაფრთხილება, თუ აქცია ხალხის სამოძრაო ადგილას იმართება.

შსს-ს ენიჭება უფლებამოსილება, გასცეს შესასრულებლად სავალდებულო მითითება შეკრების ან მანიფესტაციის ჩატარების ალტერნატიული დროის ან/და ადგილის, ასევე ალტერნატიული სვლაგეზის შესახებ.

კანონის დარღვევა, გამოიწვევს ადმინისტრაციულ პატიმრობას 15 დღემდე ვადით, სამართალდარღვევის საგნის კონფისკაციით, ხოლო თუ სამართალდამრღვევი ორგანიზატორია − ადმინისტრაციულ პატიმრობას 20 დღემდე ვადით, სამართალდარღვევის საგნის კონფისკაციით. ამ ქმედებისთვის სახდელდადებული პირის მიერ იმავე ქმედების ჩადენა სისხლისაამართლებრივ პასუხისმგებლობას გამოიწვევს - თავისუფლების აღკვეთას ვადით ერთ წლამდე.

ამ თემაზე:

სახალხო დამცველი საკონსტიტუციოში გაასაჩივრებს პროტესტის შემზღუდველ კანონებს