საქართველოს პრემიერ-მინისტრი ირაკლი ღარიბაშვილი კიშინიოვში, ევროპული პოლიტიკური გაერთიანების (EPC) მეორე სამიტზე საქართველოს უსაფრთხოების გამოწვევებზე ისაუბრებს. ამის შესახებ მან სამიტის დაწყებამდე განაცხადა. ღარიბაშვილმა ერთ-ერთ მთავარ გამოწვევად ოკუპაცია დაასახელა.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 6 ბჟანიას ქართველი დეპუტატები აფხაზეთში ფარულად ჩამოჰყავდა - არძინბა
ჟურნალისტებმა ღარიბაშვილს ჰკითხეს, რას ითხოვს საქართველოს ხელისუფლება ქვეყნის უსაფრთხოების უზრუნველსაყოფად, რაზეც მან უპასუხა:
„სამწუხაროდ, ჩვენ არ ვართ არც ევროკავშირის, არც NATO-ს წევრი ქვეყანა და ჩვენ არ გვაქვს უსაფრთხოების ქოლგა და გარანტიები. აქედან გამომდინარე, რა თქმა უნდა, ჩვენთვის განსაკუთრებით მნიშვნელოვანია, რომ ჩვენმა ხელისუფლებამ გადადგას სწორი ნაბიჯები, რომ პირველ რიგში, ამ მეტად არაპროგნოზირებად გარემოში ჯერ ჩვენი ქვეყანა დავიცვათ, ჩვენი ქვეყანა გადავარჩინოთ და რა თქმა უნდა, ჩვენ უნდა ვიზრუნოთ ჩვენი ხალხის და მოსახლეობის უსაფრთხოებაზე. ჩვენი პოლიტიკა რაც არის, ეს არის მშვიდობიანი პოლიტიკა. ჩვენ შევინარჩუნეთ მშვიდობა, განვამტკიცეთ და ამ მშვიდობიანი პოლიტიკით მიგვყავს ჩვენი ქვეყანა გაერთიანებისკენ“.
ღარიბაშვილის თქმით, სამიტზე დააფიქსირებს, რომ საქართველო მზად არის და იმსახურებს, ევროკავშირის წევრობის კანდიდატი ქვეყნის სტატუსი მიიღოს. პრემიერ-მინისტრის თქმით, ეს ევროპელი პარტნიორებისთვის უალტერნატივო, ერთადერთი სწორი გადაწყვეტილება იქნება.
EPC-ის მეორე სამიტში მონაწილეობას უკრაინის პრეზიდენტი ვოლოდიმირ ზელენსკიც მიიღებს, რომელიც მოლდოვაში ჩავიდა. საქართველოს პრემიერ-მინისტრმა სამიტის დაწყებამდე აღნიშნა, რომ საქართველო სოლიდარობას უცხადებს მეგობარ უკრაინას და უკრაინელ ხალხს.
„ჩვენი, ყველას სურვილია, რომ ეს ომი მალე დასრულდეს, აღდგეს ტერიტორიული მთლიანობა და მშვიდობამ დაისადგუროს უკრაინაში და მთელს მსოფლიოში“, - განაცხადა ირაკლი ღარიბაშვილმა და დაამატა: „რა თქმა უნდა, ჩვენი დიდი სურვილი და დიდი ოცნებაა, რომ ჩვენს ქვეყანაში მოხდეს დეოკუპაცია მშვიდობიანად, ჩვენი ქვეყანა გაერთიანდეს. ჩვენი ხელისუფლება ყველაფერს აკეთებს ამ მიმართულებით, რომ რაც შეიძლება მალე მოხდეს ამ დიდი მიზნის მიღწევა“.
EPC-ის მეორე სამიტზე დასასწრებად 47 სახელმწიფოსა და მთავრობის მეთაურია მიწვეული. სამიტში მონაწილეობას მიიღებენ ევროპის საბჭოს, ევროკომისიის და ევროპარლამენტის პრეზიდენტებიც.
