საქართველოს მეხუთე პრეზიდენტის, სალომე ზურაბიშვილის შეფასებით, ონლაინგამოცემების „ბათუმელებისა“ და „ნეტგაზეთის“ ხელმძღვანელის, მზია ამაღლობელის დაპატიმრება სხვების დაშინების მცდელობაა.
ახალი ამბები
მკითხველის რჩეული
- 1 რუსეთი ალეკო ელისაშვილს დაუსწრებლად ასამართლებს უკრაინაში ბრძოლისთვის
- 2 როგორ დაგეგმეს ლევან ჯანგველაძის შეკვეთილი მკვლელობა - პროკურატურამ 5 პირს ბრალი წარუდგინა
- 3 დასკვნითი სხდომის პარალელურად, ბათუმში მზია ამაღლობელის მხარდამჭერი აქცია იმართება
- 4 „ქართულმა ოცნებამ“ 63 მუნიციპალიტეტში მერობის კანდიდატები წარადგინა
- 5 სახელმწიფო დეპარტამენტის ანგარიში: „ტიტუშკები“, თავდასხმები მედიაზე და დაუსჯელობა
- 6 მნიშვნელოვანია, საქართველოს ხელისუფლების აღიარება საქმედ იქცეს – ზახაროვა აგვისტოს ომზე
ვაშინგტონში, „ატლანტიკური საბჭოს“ (Atlantic Council) მიერ ორგანზიებული დისკუსიის დროს ზურაბიშვილმა განაცხადა, რომ სასჯელი, რომელიც მზია ამაღლობელს ემუქრება, სიგიჟეა. მისი თქმით, შესაძლებელი იყო ადმინისტრაციული პასუხისმგებლობის გამოყენება.
„ეს არის დანარჩენი მოსახლეობის დაშინების მცდელობა. ისინი ვერ შეძლებენ [მზია ამაღლობელის] დაშინებას, ის ძალიან ძლიერია, მაგრამ ეს არის სხვების დაშინების მცდელობა იმის თქმით, რომ ეს მოგივათ.
იგივე ხდება მსახიობზეც [ანდრო ჭიჭინაძეზე], რომელსაც საზოგადოება კარგად იცნობს და ძალიან პოპულარულია. საზოგადოებას ეუბნებიან - თუ ჩვენ შეგვიძლია მასთან მიმართებაში ასე მოქცევა და 9 წლის მისჯა, ეს არის ის, რაც მას ემუქრება, ნიშნავს, რომ ნებისმიერ თქვენგანს შეიძლება იგივე დაემართოს. არავინ არის დაცული, ისინიც კი, ვინც ცნობილები და პოპულარულები არიან“, - განაცხადა სალომე ზურაბიშვილმა და აღნიშნა, რომ ეს არ იმუშავებს:
„გულწრფელად რომ ვთქვათ, ეს არის რეპრესიების პრობლემა. თუ ვერ გატეხავ ხალხს - და არ მგონია, რომ საქართველოს გატეხვა შესაძლებელია - მაშინ მიიღებ მეტ რეაქციას, წინააღმდეგობას და ფაქტობრივად, ამით აძლიერებ საპროტესტო მოძრაობას. ეს არის ის, რასაც ჩვენ ვხედავთ“.
მზია ამაღლობელი ბათუმის პოლიციის უფროსზე, ირაკლი დგებუაძეზე თავდასხმის ბრალდებით არის დაკავებული და 4-დან 7 წლამდე ვადით თავისუფლების აღკვეთა ემუქრება.
ადვოკატების შეფასებით, ჟურნალისტის სისხლისსამართლებრივი დევნა უკანონოა, ატარებს დაშინების და პოლიტიკური რეპრესიის სახეს, რადგან მისი ქმედება - გაშლილი ხელი, რომელიც ირაკლი დგებუაძის სახეზე ხვდება - პოლიციელზე თავდასხმის მუხლით ვერ დაკვალიფიცირდება.
წინასწარ პატიმრობაში მყოფი მზია ამაღლობელი უკვე მე-11 დღეა შიმშილობს. მისი გათავისუფლების და ბათუმის პოლიციის უფროსისთვის უფლებამოსილების შეჩერების მოთხოვნით ჟურნალისტები აქციებს ყოველდღე მართავენ.
