ოკუპირებული აფხაზეთის ე.წ. სახელმწიფო უსაფრთხოების სამსახურმა გალის რაიონის სოფელ მეორე ოტობაიაში (ბგოურა) 17 აგვისტოს საქართველოს ორი მოქალაქე დააკავა. 1964 წელს დაბადებულ რემიკო და 1967 წელს დაბადებულ მურთაზ ჭითანავებს ე.წ. საზღვრის უკანონო გადაკვეთაში დახმარებას ედავებიან.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
დე ფაქტო სახელმწიფო უსაფრთხოების სამსახურის განცხადებით, ჭითანავებს აფხაზეთში ბინადრობის ნებართვა აქვთ და ე.წ. საზღვართან ახლოს ცხოვრობენ.
„აღნიშნული პირები იყენებდნენ გეოგრაფიულად ხელსაყრელ საცხოვრებელ ადგილს, რომელიც უშუალოდ ესაზღვრება საქართველოს ტერიტორიას და დახმარებას უწვდნენ სახელმწიფო საზღვრის უკანონო გადაკვეთაში. დაკავებულთა საცხოვრებელი სახლების დათვალიერებისას აღმოჩენილია F1 ხელყუმბარა, RGD-5 ხელყუმბარა, 1600 გრამი ტროტილი, 45 გრამი - პლასტიდი, ტროტილის ბლოკი, სხვადასხვა კალიბრის ვაზნები და დოლარის კუპიურების დასტა“, - განაცხადეს ე.წ. სახელმწიფო უსაფრთხოების სამსახურში.
აღსანიშნავია, რომ ე.წ. სახელმწიფო უსაფრთხოების სამსახურის მიერ გამოქვეყნებულ ვიდეოში რამდენიმე ათეული ერთდოლარიანი ჩანს.
საქართველოს სახელმწიფო უსაფრთხოების სამსახურმა საქართველოს ორი მოქალაქის უკანონოდ დაკავების შესახებ ინფორმაცია დღეს, 21 აგვისტოს გაავრცელა.
სუს-ის განცხადებით, საოკუპაციო რეჟიმის წარმომადგენლებმა, საქართველოში ევროკავშირის სადამკვირვებლო მისიის (EUMM) მიერ ოპერირებული ცხელი ხაზის მეშვეობით განაცხადეს, რომ ე.წ. სისხლის სამართლის საქმე აღძრულია „უკანონო მიგრაციის ორგანიზების“ ე.წ. „ბრალდებით“, უკანონოდ დაკავებულ ორივე პირს, ე.წ. „სასამართლოს“ მიერ „მიესაჯა“ 2 თვიანი „წინასწარი პატიმრობა“ და ამჟამად იმყოფებიან ე.წ „აფხაზეთის სახელმწიფო უშიშროების სამსახურის იზოლატორში“.
„უკანონო დაკავების ფაქტთან დაკავშირებით, საქართველოს სახელმწიფო უსაფრთხოების სამსახურმა მოახდინა ჟენევის საერთაშორისო დისკუსიების თანათავმჯდომარეებისა და საერთაშორისო პარტნიორების ინფორმირება. ამოქმედებულია ყველა არსებული მექანიზმი და აქტიურად მიმდინარეობს მუშაობა აღნიშნული პირების დაუყოვნებლივ გათავისუფლების მიზნით“, - ნათქვამია სუს-ის განცხადებაში.
აფხაზეთის დე ფაქტო სახელმწიფო უსაფრთხოების სამსახურის თანამშრომლებმა ასევე დააკავეს რუსეთის ორი მოქალაქე, რომლებიც საქართველოსა და აფხაზეთის ე.წ. საზღვრის უკანონოდ გადაკვეთას ცდილობდნენ. მანამდე ისინი რუსეთიდან აფხაზეთში ყალბი დოკუმენტებით შევიდნენ.
ე.წ. სახელმწიფო უსაფრთხოების სამსახური აღნიშნავს, რომ საქართველოსა და თურქეთის „კრიმინალური სტრუქტურების“ წევრების მიერ აფხაზეთში შეღწევის მიზნით სასაზღვრო რეჟიმის დარღვევის მცდელობების რაოდენობა გაზრდილია.
