ოპოზიციის ასაკრძალად საკონსტიტუციო სასამართლოში სარჩელი ოქტომბერში შევა

„ოქტომბერში შევა წესით შესაბამისი სარჩელი ყველა იმ პარტიის არაკონსტიტუციურად გამოცხადებასთან დაკავშირებით, რომელიც მოიაზრება კოლექტიური „ნაცმოძრაობის“ ქვეშ. ეს არის დემოკრატიული პროცესი და ეს სარჩელი აუცილებლად შევა საკონსტიტუციო სასამართლოში“, – უთხრა კობახიძემ ჟურნალისტებს.

მანამდე „ქართული ოცნების“ პარლამენტში შექმნილი დროებითი საგამოძიებო კომისიის თავმჯდომარემ, თეა წულუკიანმა თქვა, რომ კომისიის დასკვნა გახდება საფუძველი საკონსტიტუციო სასამართლოში შესაბამისი სამართლებრივი პროცედურების წამოწყებისა, რომლის მიზანიც „ნაციონალური მოძრაობის“ და მისი წევრების პოლიტიკური საქმიანობის აკრძალვა იქნება.

ოპოზიციური პარტიების აკრძალვა „ქართული ოცნების“ ერთ-ერთი მთავარი დაპირება იყო 2024 წლის საპარლამენტო არჩევნების წინ.

„ერთიანი ნაციონალური მოძრაობის“ გარდა, „ქართული ოცნების“ სამიზნეა „სტრატეგია აღმაშენებელი“, „ევროპული საქართველო“, „ახალი“, „გირჩი - მეტი თავისუფლება“, „დროა“, „ლელო“ და „გახარია - საქართველოსთვის“.