„ოცნება“ სავალდებულო მკურნალობას ნარკოდანაშაულისთვის სასჯელის სახედ განიხილავს

მდინარაძის თქმით, 17 მარტს, უმრავლესობის სხდომაზე, ამ საკითხთან დაკავშირებით „ფართო დისკუსია“ გაიმართა.

„გარდა იმისა, რაც დაანონსებული იყო, ჩვენ შევჯერდით, რომ სისხლის სამართლის კოდექსში სასჯელის სახით შემოვიდეს სავალდებულო მკურნალობა, თუმცა ეს იქნება განსაკუთრებულ შემთხვევაში.

ეს არ იქნება ადმინისტრაციული სახდელი, ეს იქნება სისხლის სამართლის ნორმაში გაწერილი სასჯელი. იმ შემთხვევაში, თუ პირს ნარკოტიკული დანაშაულისთვის მიესჯება სასჯელი, შესაძლოა, განსაკუთრებულ შემთხვევაში - და ეს იქნება მოსამართლის დისკრეციის ფარგლებში, შესაძლებელია, ამ დისკრეციის განხორციელებას საფუძვლად დაედოს საქმეში არსებულ მასალებთან ერთად ნარკოლოგიური ექსპერტიზის დასკვნა - მოსამართლემ გადაწყვიტოს, რომ ამ კონკრეტული ადამიანის ჯანმრთელობაზე ზრუნვის თვალსაზრისით - არა მხოლოდ კერძო პრევენცია, არამედ ზოგადი პრევენციისთვისაც - კარგი იყოს ამ სასჯელის დანიშვნა სხვა სასჯელთან ერთად, ან უამისოდ.

ჩვენ ამაზე მსჯელობას გავაგრძელებთ. სტრასბურგის პრეცედენტიც კი გვაძლევს ამის საშუალებას, რომ იმ შემთხვევაში, თუ ადამიანი საკუთარ თავს უქმნის საფრთხეს, ასევე საზოგადოებრივად არის საშიში და მას, შესაძლოა, ესაჭიროებოდეს სავალდებულო მკურნალობა, ეს გადაწყვეტილება, შეიძლება, მიიღოს მოსამართლემ“, – განაცხადა მამუკა მდინარაძემ.

საკანონმდებლო პაკეტს, რომელიც ნარკოდანაშაულისთვის სასჯელის გამკაცრებას ითვალისწინებს, „ქართული ოცნება“ მეორე მოსმენით მიმდინარე კვირაში მიიღებს. მდინარაძემ გაიმეორა, რომ „ნარკოგამსაღებლების, როგორც მკვლელების მიმართ“ სახელმწიფოს უმკაცრესი მიდგომა ექნება.