„ოცნებამ“ უკან გაიწვია საკრებულოებში ახალი თანამდებობების შექმნის შესახებ კანონპროექტები

საუბარია „ადგილობრივი თვითმმართველობის კოდექსსა“ და სხვა კანონებში დაგეგმილ ცვლილებებზე, რომლის ამოქმედების შედეგად თვითმმართველი ქალაქების - თბილისის, ქუთაისის, ფოთის, ბათუმისა და რუსთავის საკრებულოს თავმჯდომარეებს ოთხი მოადგილე ეყოლებოდათ, ნაცვლად სამისა. გარდა ამისა, დაგეგმილი იყო საკრებულოს კომისიის თავმჯდომარის მოადგილის თანამდებობის შემოღება.

საკანონმდებლო ცვლილებების ინიციატორები იყვნენ ირაკლი ქადაგიშვილი, ზვიად შალამბერიძე, ანზორ ბოლქვაძე, ნიკა ელისაშვილი, ზაურ დარგალი, დიმიტრი ხუნდაძე, შოთა ხაბარელი, ირაკლი შატაკიშვილი და ნინო წილოსანი. ისინი ცვლილებების დაჩქარებული წესით მიღებას ითხოვდნენ.

ინიციატორების განმარტებით, კანონპროექტებით გათვალისწინებული ცვლილების განხორციელება დაკავშირებულია ადგილობრივი ბიუჯეტის დამატებით ხარჯებთან, რაც ამ ეტაპზე მიზანშეუწონელია.