33 წლის გიორგი გოჩიტაშვილს, რომელმაც დედოფლისწყაროში პრემიერ-მინისტრ ირაკლი ღარიბაშვილის სახლის ღობეს სატვირთო მანქანა დააჯახა, ხონის ფსიქიატრიულ საავადმყოფოში იძულებით მკურნალობა მიუსაჯეს.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 5 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 6 ბჟანიას ქართველი დეპუტატები აფხაზეთში ფარულად ჩამოჰყავდა - არძინბა
განჩინება სიღნაღის რაიონული სასამართლოს მოსამართლე გიორგი ბუხრაშვილმა 30 ივნისს, სასამართლო ექსპერტიზის ეროვნული ბიუროს დასკვნის საფუძველზე და პროკურატურის მოთხოვნით მიიღო. პროცესს ბრალდებული ვერ დაესწრო, რადგან ის უკვე ხონის ფსიქიატრიულში ჰყავდათ მოთავსებული. ადვოკატის განმარტებით, ტექნიკურად ვერ მოხერხდა ინტერნეტით ჩაერთოთ.
მანამდე, გოჩიტაშვილის მონაწილეობით სიღნაღის რაიონულ სასამართლოში ორი სხდომა გაიმართა. გოჩიტაშვილმა თავი დამნაშავედ არ ცნო, თუმცა თქვა, რომ ღარიბაშვილების სახლის ღობეს სატვირთო ნამდვილად მან დააჯახა.
„მიმაჩნია, რომ სწორად გავაკეთე. მე არსად გამქცევი არ ვარ, არც ახალი დანაშაულის ჩამდენი ვარ. ჩემი საქმე გავაკეთე და გამოვაფხიზლე ეს ხალხი ამ კლანისგან გასათავისუფლებლად, ვისაც თქვენ ემსახურებით. თქვენ უნდა ემსახურებოდეთ თქვენს ქვეყანას და არა კლანს, ვიღაც ღარიბაშვილებს, ვიღაც დედამო*****ებს“, - მიმართა მოსამართლეს გოჩიტაშვილმა.
მას არ უთქვამს, რატომ დაეჯახა ღარიბაშვილების სახლის ღობეს. რამდენიმე წყაროს ინფორმაციით, გოჩიტაშვილი ღარიბაშვილებთან მუშად მუშაობდა, პრემიერის მამას მეორადი სამშენებლო მასალა სთხოვა, მისგან უარმა კი გაანაწყენა.
სისხლის სამართლის საქმეში პრემიერ-მინისტრის ოჯახის არცერთი წევრი დაზარალებულად ცნობილი არ არის. პროკურატურამ გოჩიტაშვილს ბრალი არა ღარიბაშვილების ქონების დაზიანების, არამედ, სსკ-ის 353-ე მუხლით წარუდგინა, რაც პოლიციელების მიმართ წინააღმდეგობას, მუქარას ან ძალადობას გულისხმობს.
საქმის მასალების თანახმად, გოჩიტაშვილმა სატვირთო დააჯახა პოლიციის კუთვნილ მანქანას, დაკავებისას კი სამართალდამცავებს წინააღმდეგობა გაუწია.
გიორგი გოჩიტაშვილს სახაზინო ადვოკატი არჩილ ტუხაშვილი იცავდა. როგორც მან „საქართველოს ამბებს“ უთხრა, ფსიქიატრიულში იძულებით მკურნალობის მაქსიმალური ვადა 2 წელი 6 თვეა, თუმცა სამედიცინო კომისიის გადაწყვეტილებით, აღნიშნული სასჯელის ვადა, შესაძლოა, შემცირდეს.
გიორგი გოჩიტაშვილი პრემიერის საცხოვრებელი სახლის ღობეს მეგობრის კუთვნილი სატვირთო მანქანით 23 აპრილს დაეჯახა, რის შემდეგაც შემთხვევის ადგილიდან მიმალვა სცადა. პოლიციამ ის იმავე, დღეს თბილისისკენ მიმავალ გზაზე, ლილოში დააკავა.
ფსიქიაუტრიულში იძულებით მკურნალობის მისჯის შემდეგ, გოჩიტაშვილის მიმართ სისხლის სამართლებრივი დევნა შეწყდა. მისი ოჯახის წევრები მედიასთან კომენტარს არ აკეთებენ. „საქართველოს ამბებისთვის“ ცნობილია, რომ გოჩიტაშვილს მენტალურ ჯანმრთელობასთან დაკავშირებული პრობლემები აქვს.
